一入侯門深似海最哀艷的一幕

起誤會怒摑嬌妻

夫人：（和尙思妻）長日寄佛門，與佛同渡世，矢心修拜，保佑趙家福祿齊，好彩我乖仔娶得好嬌妻，貌美賢德更盡禮，可惜新抱尙未有孫仔。（自語白）我今日去觀音廟作福，個個廟祝交帶我將拜完神的紅鷄同埋糖蓮子靜靜收埋响家嫂個枕頭底下，七七四十九日就會有喜㗎叻好，趁家嫂响琼秀間房傾緊偈，快的整妥先，秋菊、跟住我入嚟

夫人：（白）桂香、你捧住呢碗乜野嚟喋。

桂香：（支吾白）……係補藥嚟啫，亞少奶呌我㷛定俾佢飮嘅。

夫人：（白）咁你放低响枱面，搵的野冚住佢先，唔好攤凍晒呀。

桂香：（白〕哦、

夫人：（白）好、等我念幾句經落去，等亞家嫂飮咗好身好運，連生貴子至得。

詠湘：（頻頻作咳，兩頭徘徊心聲白）唉、我呢個病係以前俾老板踢傷嘅，我現在係趙家已經俾人睇少叻，所以我更唔願意有呢個痛症，而透露出我以前卑微嘅執業，今晚我原本約咗亞紹良三更時份嚟花園，準備比的錢佢上京嘅，但係至到而家我尙未籌到呢筆欵，唔知點樣好叻。

夫人：（見湘返，欣然白）家嫂。

詠湘：（失驚白）哦、奶奶、乜仲未抖呀。

夫人：（口古）未呀，今晚我份外精神，唔瞓得咁早，所以一心到嚟想同你傾吓偈啫。

詠湘：（口古）奶奶、你對我眞係好叻，假如唔係你處處維護住我，信得過趙家上下個個都將我睇低。叻

夫人：（口古）婆媳之間好應該互相敬愛嘅，係呢，你趁熱飮咗呢碗補藥啦，須知一個人嘅身體健康，最爲珍貴。

詠湘：（口古）奶奶，你咁關懷我，咁體貼我，我眞係唔知點樣報答你嘅恩義巍巍。叻

夫人：（白）家嫂，你想報答我容乜易啫，（三脚櫈）趙家人丁素衰微，三代單傳一█仔。散葉開枝全靠你，只求早日產孩提。但得有孫繼香燈，足使老人心快慰。

詠湘：（接唱）感謝婆婆施訓勉，媳婦謹記不忘遺。（花上句）只愁綠葉不成陰，有負所期心自愧。

夫人：（笑白）家嫂，你唔駛担心嘅，你梗有得生，因爲我整咗多少鬼馬野，响你張床底。

詠湘：（笑白）奶奶、究竟你整咗的乜野係我張床度呀，講比我知啦。

夫人：（白）唏、講俾你知到就唔靈嘅啦，而家時候唔早，亞明都怕就番嘅㗎叻，你休息吓先啦，桂香、秋菊跟我番出去唔好嘈住少奶瞓。

詠湘：（白）奶奶、咁你好聲行，早的抖叻。

詠湘：（嘆氣心聲，花下句）愧無財帛酬知己，怎得黃金决難題。如何應付費思量，迫於托詞求夫婿

詠湘：（見明返，急趨前白）明哥，乜咁夜至番嘅呀、你係唔係飮醉酒呢。

學明：（冷笑、白）我飮醉，哈哈，你都冇我咁淸醒呀

詠湘：（上前、白）明哥，睇吓你丫，無端端揸住枝木棒，仲話唔係飮醉酒添。

學明：（口古）詠湘，我實話俾你知啦，我恐防今晚有人將我暗算，所以我揸住枝木棒，就係要嚟旁自衞。

詠湘：（一才關自）（口古）明哥，你一向與人無忤，點會有人暗算你呢，睇你今晚精神彷彿，語無倫次，眞令我莫解疑謎。

學明：（冷笑白）我精神彷彿，（一才）我語無倫次（一才）哈哈（花下句）莫當夫郞神智亂，（一才）雖然酒後未昏迷。因何不見揷金釵，快些直言毋虛偽。（白）詠湘、你枝金釵撑咗去邊，快的講。

詠湘：（驚惶地）（白）吓、金釵……我……係……我一時不愼遺失咗叻。

學明：（冷笑白）遺失，唔係卦，（白欖）你不必巧語騙夫郞，其實我早已知詳細。你暗將金釵送情人，（一才）還當夫郞懵閉閉。你戀奸夫，（一才）（打仳一巴）眞淫穢，（一才）無廉耻，（一才）敗家規。（一才）

詠湘：（跌地、沉花下句）哎吔吔，禍起蕭牆誠慘事，百詞莫辯暗悲啼。

學明：（怒白）哼、你都幾會作狀嘅噃，我輕輕摑你兩巴，推你一掌啫，我唔信你辛苦得咁交關，有血卽管嘔出嚟啦，衰人！

詠湘：（慢的的爬起行前續唱）（花上句）夫郞暫且息雷霆，容我坦言陳底細。

學明：（喝白）你仲有乜野好講，（長二王下句）說什麽比翼雙棲，（一才）說什麽連枝幷蒂。誰料你生來淫蕩太胡爲，竟效紅杏出牆甘越軌，枉我輕憐淺愛，深恨娶錯，不賢妻。

詠湘：（撲仙令）遭刧厲，令人淚暗揮我守禮義，婦無違，還望你，休要亂責妻，盼信任，切莫難爲，（揷白）：明哥我的確冇做過對你唔住嘅事，你千祈唔好誤會呀。

學明：（接唱）你太賤格，罪惡難盡計，太混賬，叛我還作僞，心憤恨舊情亦碎毁，休再望，賦詠眉齊。（吊慢版）（白）詠嫺，以你咁卑微嘅身世而嫁倒我呢個西安留守，就應該好好地做一個賢妻良母至爲是，誰料你不安於室，竟然背夫別戀，仲靜靜約埋個奸夫响花園幽會，你咁樣做法，試問對唔對得我住，打死你個賤人至得。

學明：（白）哼、我都未曾掂到你啫，你就係處整色整水叻，哼、任你點樣作狀，我絕對唔會可憐你嘅，我嚟問聲你，今日同你係花園幽會个個男人係邊個嚟，你快的講。

詠湘：（慢的的關目，行近學明身前跪下，悲咽白）唉、明哥、（乙反中版上句）當日姊妹花，淪落在天涯，嘗盡辛酸，何慘厲，幸得摯友郭紹良，仗義爲懷憐弱燕，常施援助，挽垂危。得人花戴萬年香，受人恩義豈能忘。（轉花）今日約會花園，無非酬恩惠。（悲咽白）明哥、我共佢只係一對難中知己，絕對冇半點私情暖昧，今日但亞媽不幸身亡，無錢殮葬，迫於無奈至有走嚟求我帮助，因爲我素知你爲人善妒，所以唔敢對你講，靜靜送咗枝金釵比佢變賣，等佢得以埋葬親娘，我亦總算報答咗佢當年嘅恩惠，明哥，唔通你咁都唔相信我咩。（哭泣）

說明：（悻然白）哼、我親眼睇住你共佢喁喁細語，親熱非常，你仲想𠱓我咩，（執棒快中板下句）學明不是三歲孩提。密約花間顯然不軌。無情棒下怒打淫妻。（包才舉棒欲打又覺不忍）（花上句）一念到枕畔恩情，（一才）又豈忍摧殘佳麗。（怒白）你精精地就好招認，若果唔係我打死你，（舉棒作狀恐嚇）

詠湘：（慘呌白）唉吔、明哥，我……我好辛苦呀。

學明：（一才、白）吓、你份人都幾會攞彩個噃，明知我唔捨得打你，專登係處詐死嚟嚇我係馬，懶彩你呀。

詠湘：（呻吟白）明哥，我唔係詐諦唎，（花下句）彷彿似心穿萬箭，痛得我魄蕩神迷。一陣陣血湧心頭，（一才）嗟莫是難逃刧例。

學明：（囘頭見狀重一才驚愕萬分，急拉住詠湘大呌，白）詠湘，我都冇打倒你，點解你週身都係血丫。

詠湘：（氣喘、白）明哥、我……呢次實死咯。

學明：（狂呌白）詠湘，詠湘……救命呀……

夫人：（見湘滿身鮮血，大驚，急趨前白）唉吔、家嫂，做乜你滿身都係血呀，邊個咁冇陰功打到你咁慘呌。

學明：（驚惶萬狀，白）亞媽，係……我……