「含笑飲砒霜」之私探監牢

一往：喂，兄弟，唔該你押我去個便個監房，好過喺呢間咁孤單呀。

獄卒：你又想叻，個間正押着一個女犯人，男女有別，點可以撈埋一堆呀。

一往：唔啱個間呀，人多的熱鬧丫馬。

獄卒：個間係打刧拉番嚟嘅重犯，你不過酒醉打人扣押三日之馬，走埋個間你好餂底㗎。

一往：唔怕。

獄卒：喂，你唔係住客店，點可以任揀入去啦。

　　（一往被扣押在另一牢柵內與桃紅遙遙相對）

一往：（南音）估話無端生事，可以接近嬌姿。怎料相逢仍是隔天地。

桃紅：（接唱）認罪公堂惟待死。未悉個郞因甚被囚覊。

一往：（接唱）眞正是坐監容易。出監就唔輕易，棋差一着尙有何詞。

桃紅：（接唱）咫尺天涯難寄語。

一往：（接唱）怎能相對訴衷私。

桃紅：（接唱）心底驚疑愁不已。

一往：（接唱）憂煩空仰星斗移。

　　（一往行來行去設法，見獄卒過大呼叫）

一往：哎喲，痛死我呀。

獄卒：做乜嘢呀。

一往：唔該你同我買的藥油止吓肚痛。

獄卒：乜你咁多事㗎。

一往：唔該你喇，好心唔怕做，（取銀）呢度一錢，有净你擁去飲酒喇

　　（一往乘其不覺取去門匙）

獄卒：咁就得嘅叻，你忍住一陣先，我就返嚟

一往：買耐的都唔緊要。

　　（一往見獄卒去卽痛苦若失，開門出）

　　（桃紅見一往行來大異）

桃紅：你點解要坐監。

一往：我想嚟見吓你囉，都唔知出盡幾多辦法至有監坐。

桃紅：乜你咁傻㗎，你應該快離開呢度，遠走高飛至係㗎。

一往：我唔捨得離開你，你而家點呀？

桃紅：（鳥驚喧中段）閨裡遽遭橫禍至，公堂簽押，肩承重罪愁無語，拚一死，免至累程郞你。

一往：（接唱）雖則芳心一點眞摯愛念對我恩義。我心却未能，逍遙裡奔逃拋棄鴛侶不理。

桃紅：（接唱）心不忍你招官非，喜得不致受牽連，當自遠去，不遠去，反累事。

一往：（接唱）痴心眷戀禍福也共嘗，到死志莫移，鴛鴦同命鳥，生死當然要共你一致，那用猶疑。

桃紅：（接唱）只嘆艶史變恨史，勸君要自持，還望奮起冲霄志，休掛薄命娥眉

一往：（白）桃紅，呢件事由我而起嘅，我又點能够令你一個人受罪呢。

桃紅：（白）唉，我係弱質女子，死咗亦好閒啫，你係一個有志有爲嘅靑年，就無謂牽累你啦馬，一往哥，如果你出咗獄之後就要發奮做人，千祈咪再嚟見我喇。

一往：（白）桃紅，你咁樣爲我，我眞唔知點樣感激你……

　　（周虎與賊黨押着一公差冲入喝開牢柵救出同黨）

　　（守備與官兵從另一門冲入）

守備：快的冲前。

　　（守備與賊首大戰）

　　（官兵與賊黨大戰）（玉龍與官兵也加入戰團）

　　（桃紅與一往靠在一起觀望）

　　（官兵漸漸不支被迫退後）（玉龍被盜首迫於危急）

　　（一往順手執木棍將盜黨擊傷）

　　（玉龍見一往神勇驚奇）

　　（一往繼續將賊黨打倒）

　　（衆賊黨畧散，紛紛逃命）（官兵追出）

　　（玉龍大喜即趨前）

玉龍：（口古）將壯士退賊救命之恩，本官感激不已。

一往：（口古）恨賊人猖獗，將大人保護，罪犯份所不辭。

玉龍：（口古）程一住，你武藝超羣，不愧英雄器宇，可否隨守備去擒賊爲本官驅馳。

一往：（口古）大人旣然有命，一往自當効死。

玉龍：（口古）楊守備，你與他追踪前去，不可延遲。

一往、守備：（同白）遵命。

　　（一往囘首望桃紅依依不捨）

　　（鏡頭推向桃紅處，桃紅無限感慨）