「金釵引鳳凰」之
推翻鴛鴦譜
家凰：（火介快點下句）百詞莫辯語含糊。背約嫌貧因愛富。竟和硯友賦夭桃，（花）火遮眼（一才）怒迷心（一才）我要痛打你個淫賤婦。（追玉鳳打介）
劍靑；（叻叻鼓走入新房，見狀白）喂，你玩新抱都唔好玩得咁過份呀書友，（家凰見劍靑長嘆怒立一邊）
劍靑；（對鳳白）有冇嚇親你呀好老婆。
玉鳳；（啼吼白）鬼係你老婆，我唔嫁你（一才）（花下句）我要推翻婚約（一才）萬不能與你共結夭桃。你記否爲月老（一才）攝合我嫁秦郞（一才）上轎與拜堂，我以爲嫁入秦家爲婦。
劍菁；（口古）講笑搵第樣，雖然我以前同你造媒人，介紹書友啫，但後來你甘心情願嫁我呀嗎（一才）豈可在花燭洞房推翻鴛譜。
家凰；（口古）幸得書友一言成鐵証，唔係我冤枉你嘅啦，你縱有唇槍舌劍，此際狡辯也徒勞。
玉鳳；（白）劍靑，我幾時話甘心情願嫁你呀。
劍靑；（白）如果你唔鍾意我嘅，又點會送金釵同我訂婚呢？
家凰；（緊張白）吓，佢重比金釵同你訂婚？
劍青；（取出金釵與情書長花下句）贈我以情詩，盡把痴心訴，艷句香詞令人顚倒，有詩爲証，否認亦徒勞，花旣有心當作金鈴護。更以金釵爲贈（一才）憑得信物賦夭桃。花有義，蝶豈無情，請書友將情書細覩。
家凰；（接金釵與手帕憤然白）好！睇吓你點寫至得（讀詩白）願化雙飛燕，同棲玳瑁樑，赤繩能繫足，金釵引鳳凰，（雙目怒白）丕，（快點下句）堪憐愛海起波濤。鐵証如山將我負。非關書友奪妻拏。（花）保友愛，報友情，跳出情塲踏上靑雲路。（將金釵與詩擲囘白）書友珍重，（怒走出介）
玉鳳；（狂叫白）家凰，家凰，（欲追出去）
劍靑；（攔住白）妻呀你重追乜野呀夜咯，早的抖吧啦，（以手拖住玉鳳）
玉鳳；（白）咪拉手拉脚，你好快的放手咯噃，男女授授不親我叫非禮㗎。
劍靑；（白）哦，咁就眞係千古奇聞叻，今晚洞房花燭，應行夫妻之禮，乜野叫做非禮呀。
玉鳳；（吼白）我都話唔同你做夫妻咯，邊個係你個妻至得㗎，比你累到我凄凉個凄就眞，（花下句）憤極成狂蠻性起，待儂怒碎嫁衣袍。抝碎龍鳳燭，（介）撕毁鳳凰衾，（介）怒憤難平心更苦。（大喊白）我點都唔嫁你㗎叻。
劍靑；（反綫中板下句）師妹你莫傷悲，忍見你梨花帶雨，嬌啼婉轉更風騒。我是個惜花人，自當惜玉憐香，妹呀你莫自尋苦惱，今夕花燭良宵，銀河雙星會，你又何必掩面，哀號。（花）春宵短，莫哀啼，你好應向我投懷送抱。
玉鳳；（白）行開，我唔駛你咁好心，（憤然花下句）送抱投懷非所願，恨無羽翼飛出你家廬。婚姻事，莫强求，雖知對面無緣，成陌路，（白）我同你絕無感情，你强迫我都唔嫁你㗎叻。（大喊介）
趙母；（聞哭聲大怒介白）唉吔，乜人地洞房但洞房，點解洞到喊咁緊張呀。
趙母；（見玉鳳大喊火介口古）釆，大吉利是咩，你個衰野都够黑心叻，想喊衰我地呀，我老老實實話比你聽，今晚花燭洞房咁好日子，妳喊到好似十足開喪，你保得我地全家大細至好噃。
劍靑；（陪笑白）哦，亞媽，你咁夜重未抖呀！
慧靑；（口古）抖鬼抖馬咩，亞哥你又够唔係啦，我同亞媽入嚟咁耐，佢都重唔曉得斟茶担櫈可見得佢目無尊長，藐視家姑。
劍靑；（陪笑向玉鳳口古）係呢，阿媽嚟咗叻，快的上前參見安人，重要担櫈斟茶，然後至係一個賢良媳婦。
玉鳳；（刁蠻口古）我唔係你妻子（一才）又唔係佢媳婦（一才）點解要我斟茶比佢，我要立即解除婚約，就算佢斟茶比我，我都嫌佢手粗。
劍靑；（連隨暗示細聲白），喂喂！咪咁大聲啦，比佢聽見唔得了㗎。
王鳳；（冷笑白）乜野唔得了㗎，佢會食人咩。
趙母；（白）劍靑，你而家造乜野呀，係唔係要罰亞媽企呀。
劍靑；（吱唔白）爺，爺唔係，佢唔係幾精神啫，等我嚟担啦，（立卽担櫈）亞媽請坐啦。
玉鳳；（自言自白）唔，我靈機一觸，當堂有退婚嘅妙計叻，好激到你唔要我做你新抱至得。
趙母；（點頭白）乖女你講得啱，唔怪得話新歸新抱，落地孩兒，敎訓佢至得，劍靑你叫佢躝埋嚟。
劍靑；（爲難白）亞媽，今日係我好日子，你何以咁勞氣呢？佢又唔係幾精神，不如第日至敎吧啦。
趙母；（大怒白）第日我重有定企咩，（長花下句）駡句不孝兒，竟然逆慈母，是否我無權敎新抱，佢目無尊長太氣豪，又話佢世代書香，全不知禮數，不應偏帮妻子，（一才）係唔係想娶個扭紋新抱治家姑。仔呀你不孝慈母（一才）我要責問佢何以要喊衰我嘅門戶。
劍靑；（白）佢唔係有意嘅，你老人家原諒佢無心之失啦。
玉鳳；（自言自白）借意同佢鬥吓氣先詐，話一句駁十句，駁到佢發火趕我扯，咁唔係可以推翻呢段婚事囉，同佢鬥扭紋，鬥瑯禮，磨利把咀同佢鬥掂至得，（上前义腰刁潑白）哦，我喊都冇自由嘅咩，老虔婆。
趙母；（嬲到手騰脚震白）好胆。
玉鳳；（秃頭中板下句）罵句你個老而不，（一才）乜野呌做初歸新抱，點到你想收治奴奴。你的確够刁蠻，將我辱罵千聲，我退一步時，你再進一步。須知我韓玉鳳，有名係刁蠻小姐，何懼你個惡毒家姑。遇文王，施禮樂，遇桀紂，逞干戈，你莫濫用權威，將奴欺負。我呢只鐵咀鶏，扭起紋時蠻似鐵，有陣溫文賢淑，滿口者也之乎。（花）今晚花燭夜，我地要耍花槍，家婆無權干涉到。
劍靑；（喜白）原來佢同我耍花槍啫，安樂咯。
趙母；（怒白）你乜都敢講嘅噃。
玉鳳；（滋油白）當然啦，講吓都唔得咩，（故意向劍靑打情駡俏）
趙母；（見狀一才喝白）唉吔，居然喺亞媽面前耍花槍，你想作反呀劍靑，（禿頭連環扣）又翳又氣火標高，一自佢踏入我家盧，唆擺仔你逆母。
劍靑；（接唱）媽呀你何須疑心佢原淑婦。
慧靑：（接唱）佢替大嫂作護符。
玉鳳：（接唱）你越翳越氣我眞風騒，我嘅利害你知無，你當衰娶着我，精嘅離婚。就從今無煩惱
趙母：（接唱）你大胆喺處亂嘈，釆，尚未成親唔應鬥離婚激壞人。
玉鳳：（接唱）先講條件成親同共老，望君接納奴。
劍靑：（接唱）此際盡情盡孝眞心操。
慧靑：（接唱）實行順母慰高堂。
趙母：（接唱）仔你咪聽古（包一才白）堂都拜咗咯，離得咁容易咩，當佢死嘅。
玉凰：（白）劍靑，你唔聽我話，我就唔嫁你啫。
劍靑：（白）聽，聽你有乜條件呢？
玉鳳：（白）聽住，（減字芙蓉下句）若問第一條條件，我要家婆服侍奴奴。
劍靑：（序白）咁唔係倒行逆施，咁不孝點得，
玉鳳：（序白）唔得就唔嫁啫。
劍靑：（序白）你講埋先啦。
玉鳳：（績唱）朝早要佢斟茶（一才）晚間同我洗衫衭。（一才）時可I.S 趙母反應）
劍靑：（序白）冇理由噃。
玉鳳：（序白）大條道理呀，（續唱）我替你開枝和散葉（一才）繼後香燈有大功勞。（花）有此絕大理由（一才）所以做家姑，應該要侍奉媳婦。
趙母：（白）劍靑，你行過嚟。
劍靑；（行埋白）有乜敎導呢亞媽。
趙母：（長二王下句）我要佢十二時辰做工夫，朝早耕田晚織布，晏畫打理家頭和細務，臨瞓要侍奉家姑，搥骨斟茶裝烟將水倒，呢個倀雞新抱，定要將佢磨折一遭。
慧靑：（序白）重要佢服侍呢個小姑。
趙母：（績唱）應要管教森嚴，實行要落鹽，加醋。
劍靑：（序白）順母順妻眞難造。
玉鳳：（嬌嗔白）劍靑，你過嚟。
玉鳳：（口古）劍靑，點嘅啫，我提出的條件，你話咗你個刁蠻老母聽未呀，如果佢唔應承，我就推翻鴛譜。
趙母：（白）乖仔你過嚟。
趙母：（口古）劍靑，你話咗比你個扭紋老婆聽未呀，佢唔做我地趙家媳婦由自可，如果做我媳婦就要孝順家姑。（白）話未呀。
劍靑：（陪笑白）話緊嘅叻，（慢的的關目口古）亞媽，我想反問你一聲，如果亞二妹他日嫁人遇着家婆惡嘅，你又如何是好呢？
趙母：（白）人地哈我個女就唔得囉。
劍靑：（白）咁就係，報應有循環㗎，亞媽。
趙母：（口古）我話你都懵嘅，手指抝出就痛嘅，我刻薄新抱就人地女啫，總之我對女兒應該有母愛嘅（一才）點解你越講越胡塗。
劍靑：（白）咁你就唔公道太自私叻媽。
趙母：（一才怒白）唉吔而家你算敎亞媽咯噃。
劍靑：（白）唔敢，不過以事論事啫，（花下句）媽你只重女兒輕媳婦，（一才）難免被人指摘你係惡家姑。從來報應最分明（一才）我母慈詳望你持公道。
趙母：（重一才白）哦，咁你係話亞媽唔公道啫，生仔喇，好叻，惟有等你兩公婆齊全，亞媽冇眼睇叻，我願死落陰曹（一才）向你死鬼老豆哭訴你重妻逆母。（欲向墙撞去作死介）
劍靑：（跪下口古）亞媽，請恕孩子出言冒犯，望你責罸下呢個不肖兒曹。
慧靑：（白）快的話第時唔敢啦亞哥，話啦。
劍靑；（白）第時唔敢啦媽。
趙母：（白）起身啦。
玉鳳：（口古）劍靑，我免你左右爲難叻，我唔希望你做好丈夫。希望你做個孝順孩兒，孝義你個慈祥老母。（詐嬌白）我死咗好過做人叻，（欲向墙上撞去）
劍靑：（攔住玉鳳長嘆口古）唉！師妹，你又何必聲聲尋死呢？此際我難爲孝子，更難做一個好丈夫。
慧靑：（白）點抵得佢呢，人要死，佢又學人死喎。
趙母：（白）佢詐老公嬌呀嗎？
玉鳳：（白）我使乜學你呀，詐蹄又好，惨過個丈夫錫我啫，唔抵得呀，叫你個仔錫吓你呀笨。
趙母：（白）好；我比的毒辣手段你嘆下至得，（花半句）仔呀我不准你與佢洞房花燭（一才）
玉鳳：（大喜白）重好（花半句）推翻婚事返家盧。
趙母：（白）推得咁容易咩，（花半句）終身不准你與佢同衾共枕（一才）
劍靑：（苦口苦面白）咁點得呀婚。
趙母：（白）乜唔得呀，唔得都要得嘅叻，（花半句）亞媽自然會將妾侍娶。（白）抵制佢，等佢成世守生寡，快的扶我返出去。（雲雲鑼古）（劍靑扶趙母囘去慧靑隨之，劍靑依依不捨頻頻囘頭向玉鳳作無奈關目，趙母喝劍靑隨去）
玉鳳；（白）安樂晒咯，（花下句）怎樣脫此纏身孽債（一才）惟有冲破此錦綉籠牢。尋愛侶，走天涯，黑夜私奔，越窗飛渡。（爬窗口走出）
劍靑：（快冲頭叫玉鳳不見花下句）玉人踪渺，滿腹是牢騒。不辭跋涉辛勞，只望珠還合浦。（又從窗口追出去）
趙母發覺劍靑走囘新房，與慧靑在走廊一路行一路呌劍靑）
趙母：（入房見兩人失踪白）衣，仔又唔見，連個衰野都唔見埋呢吓，（快反才介）唔得，撒散人週圍搵番個仔至得，（花下句）我守寡廿年得一粒仔，幾大都要搵佢顧住我個爛香爐。（大叫白）乖女你快的去叫齊的家丁週圍去搵啦！
慧靑：（白）哦：（與趙母行出房）
搜尋資料庫
