「金釵引鳳凰」之

錯認楊花為淑婦

玉鳳：（在新房等不耐煩兩頭行介起賣相思）惱煞良辰似虛渡，兩更鼓報，怨夫不至，急壞奴奴，冷冷銀河，春宵應到早，冷冷情懷，恨夫辜負奴。（花下句）春宵本是原無價，忍敎明月笑影孤。龍鳳燭正搖紅，暗待新郞心暗。惱

玉鳳：（見狀自言自語白）抵得但個樣丫，入到來聲都唔聲，算點嘅啫，好：你唔叫我，我又唔鬼啋你啫，（坐在一邊背着身）

家凰：（見狀自白）本來入嚟找佢悔氣嘅叻，睇佢個樣坐度印印脚幾滋油噃，好，你詐懵咩，俾兩句佢聽吓至得，（上前白）師妹。

玉鳳：（一才滋油白）有乜嘢指敎呢，師兄。

家凰：（强笑容口古）師妹，你今晚就洞房花燭叻，你梗係好輕鬆，好怏樂嘅啦，你覺得呢段婚姻，美滿唔美滿呢？請你對我坦懷直吿。

玉鳳：（自白）吓，佢眞係好問唔問，唔知佢飮醉酒抑或同我耍花槍呢（向家凰口古）師兄，我重估你問乜嘢喎，今晚洞房花燭，係我好日子，當然係好輕鬆好快樂啦，至於呢段婚姻，唔美滿我就唔嫁啦，（一才）你咁問法，我認爲你口舌虛勞。

家凰：（一才氣結又强忍囘陪笑口古）未必，我問得好合理嘅，因爲我想了解你嘅居心，何以徧要結成呢段鴛鴦譜。

玉鳳：（一才窃笑口古）唉吔好心你咯師兄，你今晚係唔係飮醉酒呀，你越問越笑話叻，問我點解要結成呢段鴛鴦譜喎，唔該你問吓你自己啦，我都唔知點解，個天注定我要嫁你造妻拏。

家凰：（重一才大怒白）唉吔你而家靠激定靠翳呀（（長二王下句）誰是你夫，（一才）你嫁誰爲婦，（一才）還敢惺惺作態說是我妻拏。你負義負情使我心火怒，你把虛榮貪慕，（一才）改嫁入趙氏家閭。可恨我玉眼無珠，（一才）錯認楊花爲淑婦。（白）你記唔記得同我訂婚嘅時候，誓過一個乜嘢嘅毒願，你點解要改嫁劍靑，（一才）你講啦，你講啦。

玉鳳：（慢的的驚愕白）吓！我嫁劍靑，咁，咁，咁我頭先唔係同你拜堂咩。

家凰：（白）呸，你幾時有同我拜堂呀，你發開口夢咩。

玉鳳：（重一才沉花下句）驚心一語，怎會嫁入趙氏門閭。（反線中板）飲泣再牽衣，求諒喚秦郞，我怎知另諧鴛鴦譜。（一才）

家凰：（白）哦！嫁人都唔知，眞係笑話啦。

玉鳳：（白）我眞係唔知㗎，（續唱）拜堂時，帶着鳳冠和頭盖，遮掩了視綫模糊。送入洞房中，正喜高駕鵲橋，久待玉郞還未到。後至見你進新房，見你冰霜冷面，以爲你戲弄奴奴。（花）怎料嫁錯夫君，拜錯堂，（一才）君呀，我要把婚約推翻，（一才）不願造趙門媳婦。