「金釵引鳳凰」之

花有情•蝶亦戀

劍靑：（喜介白）衣！書友好似來緊咁噃，（花半句）隱聽叮噹環佩响。

家凰：（花半句）定是瑤池降下，月中仙。

劍靑：（花半句）肅整衣冠候玉人。

家凰：（花半句）你要爾雅溫文，賣弄你嘅風流手段。

劍靑：（白）有分數叻，書友我件衫正唔正呀！

家凰：（白）靚叻。

玉鳳：（起送君）小姐呀，聽奴言，我介紹你雙方相見！移蓮步，應參見，呢位趙公子劍靑，呢位世兄佢姓秦。

小鳳：（接唱）我向雙方參見！

劍靑：（接唱）我忙下禮。

家凰：（接唱）我亦參見。

劍靑：有幸與天仙相見。

王鳳：（口古）小姐呀，呢位趙公子都唔知幾有你心呀！一嚟到啫，卽刻就叫我通傳，人地爲你心急到極點。

家凰：（口古）係呀師妹，我師友不辭跋踄，都無非爲拜訪粧前。

小鳳：（襝袵叫玉凰白）亞小凰，你行埋嚟啦。

玉鳳：（會意白）有乜嘢吩咐呢小姐。

玉鳳：（向劍靑白）我地小姐話多謝你喎趙公子，重有好多說話叫我轉比你添！

劍靑：（緊張白）乜野呢？（雙）

玉鳳：（起下西岐）佢問檀郞來意先，是否爲紅絲一線牽。

劍靑：（接唱）我師尊，呌我相攸會綘仙。

家凰：（接唱）老師有命來會面。

玉鳳：（接唱）佢亦有心求凰我代你穿針綫，好撮合良緣。

劍靑：（接唱）感你盛情爲我穿針綫，心事代傳言。

家凰：（接唱）望雲環，你慈悲替佢方便！

玉鳳：（接唱）嬌花有情與蝶綣戀。

劍靑：（接唱）我愛心堅。

玉鳳：（接唱）你嘅姻緣我用綫牽，（行埋向小鳳耳語介）

小鳳：（向劍靑羞介減字芙蓉下句）謝公子情義重，你嘅心事佢暗通傳。（序）公子不嫌蒲柳，眞係有幸三生咯！

玉鳳：（接唱）我替你地做紅娘，咪個過後媒人秋後扇。

劍靑：（序白）唔噲，我一定報答你嘅，（接唱）我謝媒應報答，介紹書友與你結良緣。

小鳳：（花）小鳳你快謝公子爲媒，趙公子你快問秦君意見。

劍靑：（口古）書友呢位艷婢亦可人，你願唔願與佢諧美眷。

家凰：（口古）書友，我自愧寒微，誠恐累人幸福，焉敢以慧婢爲嫌。

劍靑：（向玉鳳白）小鳳，秦公子唔嫌氣喎。

玉鳳：（口古）秦子公倘若不嫌奴婢陋質庸姿，奴婢亦不避羞慚，敢效毛遂自荐。

小鳳：（口古）信是良緣早註鴛鴦譜，呢兩對意中人結意中緣。

劍靑：（花下句）我以護花爲己任，自問情比金堅。更有火熱情懷，此身願爲嬌献。

小鳳：（羞介花下句）此日初嘗情滋味，怨郞挑撥我心弦。君你情話綿綿，更使我芳心撩亂。

劍靑：（白）師妹，我地去嗰便傾吓，（携小鳳同家鳳白）書友你同小鳳响處傾吓啦！（與小鳳向走廊行去）（家凰與玉鳳見他們行去後，兩人相對襝袱不敢開口，只是點頭微笑招呼介）

玉鳳：（口古）秦公子，我眞係唔明白你叻，聞得老爺話你同趙公子應約相攸，點解你徧要退讓婚姻，（一才）而與我呢個侍婢成婚都甘願。

家凰：（口古）我唔怕失禮你，老實對你講啦小鳳因爲我家世寒微，屢蒙趙公子推食解衣，所謂受人恩典千年記，就算師妹唔嫌貧賤，我都唔想破壞佢終身幸福，（一才）所以樂得把婚姻退讓，婚姻係門登戶對嘅，蒙你肯將寒生下嫁，我正感玉人情重，何幸得結此美滿良緣。

玉鳳：（重一才大喜沉花下句）唉吔吔，幸有識人慧眼，邂逅呢個好靑年。（起中板句）襝袵叩郞君，你情義感人，不枉我鍾情，一見。須是布衣郞，珠璣滿腹原無價，縱然捱苦，也心甜。所謂易求無價寶，難得有情郞，終有日鰲頭，獨占。淑婦甘食貧，你不嫌灶下婢，做一對愛海，情鴛。（花）夫榮妻貴定可期，望君愛我之心無改變。

家凰：（長二王下句）執手慰嬋娟，一片痴心爲嬌献，願爲粉蝶伴粧前，石爛海枯情不變，郷憐我愛，决不見異，思遷。我倘有負心，（一才）保佑我死無，棺殮。（包一才收掘）

玉鳳：（食住包一才掩家凰之口白）唉吔，我唔准你立亂誓願㗎，（花下句）相愛以誠諧白首，願郞永記此盟言。花前蜜誓慰痴郎，奴若負情，（一才）保佑我災危立見。

家凰：（一才掩玉鳳之口白）我信得你過，你何須發誓呢？（起天上人間）你我情比金堅。

玉鳳：（接唱）情比金堅，與郞君似雙飛燕。

家凰：（接唱）和嬌相戀。

玉鳳：（接唱）和君相戀。

家凰：（接唱）郎心天可見，愛你花容比天仙。

玉鳳：（接唱）我愛你多才又俊彥。

家凰：（接唱）纏綿恩愛兩心堅。

玉鳳：（花下句）君似桄榔芳心喜，綿綿情話比糖甜。君稍候，聊將信物証鴛盟，謹向檀郞奉献。（白）我去攞的野送比你，你千祈唔好行開呀，（一笑行去）

家凰：（花下句）美人恩，能消受，寒生何幸得結並頭蓮。謝天賜良緣，愛佢以誠相戀。（快冲頭，秋香帶二叔公忽忙到花園）

二叔：（見家凰先鋒鈸執家凰手口古）家凰，你快的搭午渡囘家啦，因爲你老母染咗急症，佢叫我嚟呢度搵你，立卽囘家，因爲你老母個症好危險。

家凰：（聞當大驚口古）驚聞家慈抱恙，爲人子者，自當囘家侍奉，待我先向老師告別，與你買棹囘旋。

二叔：（白）咁大件事，午渡就開身叻，不如叫丫環代轉知唔係得啦，你老師唔噲怪你嘅，卽刻同我扯罷啦！（强拉家凰去）

家凰：（邊行邊向秋香白）唔該你話比老師聽我扯叻，咁話啦丫環姐。

秋香：（白）哦！

小鳳：（花下句）深悔情狂迷理智（一才），身爲君有結孽緣。毋薄倖，（一才）莫移情，（一才）婚禮早諧，以免儂抱怨。

劍靑：（白）你放心啦師妹，（花下句）我非王魁和世美，（一才，）顧存終始决不負嬋娟。一點楊枝甘露種出並頭蓮，（一才）决不使你白頭抱怨。

小鳳：（白）嗱，千祈唔好忘記我呀，唏點解唔見咗秦公子佢地呢？

劍靑：（白）你慌唔係學我地咁去傾蜜偈咩！

小鳳：（白）人地無你咁曳。

劍靑：（白）好曳咩，不過情不自禁之嗎？

小鳳：（白）我都要返去香閨，免使丫環見倒唔方便。（與劍靑分手上樓去介）劍靑：（如痴如醉呆望介）（低首微笑行來行去介）（快地錦春花手持紅羅帕上寫有情詞包着金釵一枝行出花園望介）

春花：（望見劍靑上前白）公子有禮，請向你係唔係我地老爺嘅學生呀！

劍靑：（白）係，有乜貴幹呢丫環姐。

春花：（白）冇，我地小姐有的嘢送伸你喎。（交手帕與釵給劍靑）

劍靑：（接釵白）唔該晒你丫環姐。

春花：（白）唔駛唔該，請呀。（行出去）

劍靑：（一才白）好睇吓師妹比的乜我至得，（打開看介）一枝金釵，重有情詩添，（讀詩白）願化雙飛燕，仝棲玳瑁樑，赤繩能繫足，金釵引鳳凰，（重一才沉花下句）唉吔吔，見此情詩一首，寫盡無限纏綿。好一句金釵引鳳凰，可見痴情一片。

梅侶：（行入花園見狀大喜白）賢生。

劍靑：（囘頭一望白）弟子趙劍靑，拜見尊師。

梅侶：（口古）劍靑你眞係好艷福咯，我見你手上金釵，便知你係我女婿，因爲呢枝金釵係我女兒作訂婚証件。（白）你快的返去禀命高堂，擇吉成親啦劍靑。

劍靑：（口古）老師晚生恭敬不如從命，先行拜別囘家，向高堂禀命，與令千金共結良緣。（拜別下介）

梅侶：（花下句）喜得此東床快婿，我亦當備辦粧奩。