「金釵引鳳凰」之

拜訪紅粧

劍靑：嘩，乜咁耐重未出嚟㗎。

家凰：（白）咪個心急至得㗎書友，女人打扮起碼都要幾個時辰啦嗎？

劍靑：（秃頭起蕩舟）把玉人望，眼將穿，怒她偏要遲延。

家凰：（接唱）堪笑君心急如箭，如在弦。

劍靑：（接唱）等了一朝，人未見。

家凰：（接唱）一見原來亦要緣。

劍靑：（白）唔好翳叻書友。

家凰：（白）唔好翳，不過話你心急啫，師妹都怕就來㗎叻。

劍靑：（一才傾耳細聽白）衣！好似有脚步聲咁噃，眞係來緊叻，執番正的先，書友同我睇吓衣冠齊唔齊整。

家凰：够晒靚叻。

玉鳳：（白）兩位公子有禮。

　　（家凰劍靑同白）丫環姐有禮。

玉鳳：（口古）請問兩位，係唔係我地老爺學生，秦趙兩位公子呀！老爺經已吩咐小姐招呼你地，不過小姐正在綉閣梳粧，先派我來接見。

劍靑：（大喜口古）你地小姐派你來見我，好極，小生姓趙名劍靑，呢位係我書友秦家凰公子，特來踐約，多煩你向師妹禀報，趙劍靑急於一見蟬娟。

玉鳳：（白）两位隨便坐！

劍靑：（白）重坐咩，經已坐咗成朝叻，人等人好悶㗎，你快的再去通傳啦！

玉鳳：（白）唉吔，乜你咁心急嘅啫，趙公子。

家凰：（白）係呀，我個書友好心急㗎，唔該你做吓好心啦，丫環姐。

劍靑：（花下白）我好比急驚風，徧遇你個慢郞中，睇你輕移蓮步，急得我望眼將穿。

玉鳳：（白）咁緊張。

家凰：（花）我代佢稽首拜拜香環，望你替人方便。

劍靑：（白）快的啦。

玉鳳：（行開白）心急得佢，正式短命相，好，等我撚化你至得，（上前減字芙蓉下句）公子你急如弦上箭，我重未斟茶與遞烟。（序白）等我招呼完然後至通傳都未遲呀。

劍靑：（白）唔駛叻！

家凰：（接唱）佢急於見玉人，何以咫尺天涯遠。

劍靑：（序白）唔駛咁大招呼咯，請你快的去通傳師妹吧啦女菩薩！

玉鳳：（行開接唱）且看佢完全無忍耐（一才）眞係可笑復可憐。（花）怎及得呢位秦公子風度翩翩（一才）我願獻上靈犀一點。

劍靑：（催促白）重唔去，丫環姐。

玉鳳：（白）係叻！係叻！去係啦！（忽見蚨蝶在廳中飛來）呀！只蚨蝶咁得意喎，等我捉咗佢返去比小姐至得。（拈枱上之圓扇）

　　（蚨蝶向花園飛去，玉鳳合尺相思追出花園撲蝶介）

　　（劍靑與家凰呆視玉鳳撲蝶出園介）

劍靑：（重一才沉花下句）唉吔吔！恨煞但存心戲弄，眞使我怒火狂燃。

家凰：（花）書友你要忍氣吞聲，萬不能對她氣焰。

劍靑：（白）佢分明係撚化我嘅，你話點抵得佢個死妹釘，去鬧吓佢至得。（欲行）

家凰：（攔介白）書友，你咪咁草莽至得㗎，或者師妹故意呌佢試吓你，都未定噃，所謂禮下於人，必有所求，不若我陪你出去，向佢懇求吓吧啦。

劍靑：（一才快才關目白）係噃，好啦危就危係啦！（一齊同出花園介）