冷月寒梅最悽艷一幕

異鄉冷月似嚴霜

萬才：寒梅，嚟過，嚟過預備，一，二！

寒梅：（剛開始第一個音便唱不出來）……唔得唎，張師父，再嚟過啦。

萬才：好，好再嚟過吓！預備，一，二！

寒梅：（開始第一個音，又唱不出）張師父，唔得利！

萬才：乜話？寒梅，到而家上下要登台表演嘅時候，你就連一句都唱唔出，好啦，我張萬才喺歌樂界十多年嘅信譽，就交晒俾你啦，成班人跟住嚟仰光搵食，睇住要游水番去喺啦！（寒梅難過極，失聲痛哭）

萬才：寒梅，正話我對你脾氣係大的，你唔好怪我，由吳仲飛介紹我第一次識你嘅時候，我已經對你非常好印象，幾年後，你再嚟搵番我我應承幫你，以後我直程當你係我嘅親生女一樣，不過我心急至係咁責備你啫，亦所謂愛之愈切責之愈深啫！寒梅！

寒梅（感動地）張師父，我知你對我好，係我自己唔爭氣睹。（叩門聲）

萬才：寒梅，快的抹咗眼淚，俾人睇見唔好睇吓。

侍役：張師父，又有人送花嚟俾戚小姐噃。

萬才：（接花）唔該你吓！

萬才：寒梅，你睇吓，我地都未登台表演，幾多人送花嚟俾你，呢個係你機曾嚟㗎，你俾的勇氣，俾的心機，你一定可以成功嘅！

寒梅：（欣然接花）係咁就好咯師父一（取花上咭片一看，大驚）吓，吳仲飛，師父！你睇吓！

萬才：（取咭片看）寒梅小姐笑納，吳仲飛敬贈。（一想，釋然）唏！你咪咁怕啦寒梅，同姓同名嘅好多嘅，呢個吳仲飛未必係個個吳仲飛呀，佢又點會嚟到光仰咁喬！

寒梅：（敏感地吃驚）師父，你唔好開門，唔知係唔係佢嚟？

萬才：唏，唔會嘅，我可以决定唔係個個吳仲飛，你而家已經心情緊張連唱都唔會唱咯，你再爲呢的事担心，更影响你表演嘅嘑！

萬才：黃經理，乜咁好入嚟坐呀？請入嚟坐啦?

黄：好，好，唔駛客氣。

寒梅：黃經理，坐啦！

黃：好，好，張師父，我嚟通知聲你地，我已經安排好，戚小姐喺聽晚就開始登台演唱叻，而家各方面宣傳都已經做晒工夫嘅嘑！

萬才：好，好，黃經理，又費你心。

黃：乜說話，以戚小姐嘅天才，我信得過今次唔止話帶旺我地間夜總會，重會帶旺全個仰光添呀

寒梅：黃經理太客氣嘑，重請經理多的指敎！

黃：唔敢當，我重有的事要做，唔阻你地！

寒梅：好行呀經理！

萬才：寒梅，聽晚就開始演唱咯，今次得失枯榮，完全就在於聽晚喲嘞。

寒梅：（焦急地）師父，我聽見呢個消息我更加驚。

萬才：（煩惱地）咁點呢？……（苦思之下忽有所悟）呀，我明白嘞，寒梅！

寒梅：點呀，師父！

萬才：你呢種情形就係怯塲，同時你初次出門，太過想念屋企心情複雜咗，影响你嘅心理，我有辨法醫你！

萬才：寒梅，你記住我嘅說話，演唱一定要有眞實嘅感情，所以我昨晚時候通宵唔瞓都寫呢枝，望兒曲，俾你唱，等吓你出台嘅時候，你乜都唔好想，你要一心想住你個女阿彩霞，咁樣你自然會流露眞感情，一定唱得好嘅！

寒梅：張師父，你對我眞係無微不至，若果我有成就，我都唔知點感激你！

萬才：你嘅成就，卽是我嘅成就啫，你唔講的咁嘅說話，你快的準備啦，就快出塲嘅叻！（前台，歌台仍未揭幕，在掌聲中，黃經理向觀衆宣佈）

黃：各位嘉賓，今日係本歌壇五週年紀念，特別貢獻各位一個非常精彩節目，由張萬才歌藝團台柱戚寒梅小蛆演唱名曲，望兒曲，請各位留意欣賞！

萬才：寒梅，你今次唱得眞係成功，完全出呼我意想之外。

寒梅（感動地）師父，我嘅成功係你俾我嘅！

萬才：好叻，從此我地可以喺仰光立足叻。

寒梅：師父，我只希望能够達成我嘅目的，寄多的錢番去俾彩霞同我阿媽，唔駛等我表哥捱得咁辛苦！

萬才：你呢個希望當然可以達到，甚至可以超過你嘅希望添！

黃：戚小姐，恭喜你，你今晚演係我地歌壇五年來未有過咁精釆嘅節目，張師父，我想同你地加簽四個月合同，提高双倍包銀！

（寒梅與萬才喜極）

黃：好，聽日上寫字樓簽約啦！（萬才應之，黃去）

萬才：嗱，寒梅，你嘅希望卽刻可以實現叻。

（寒梅喜極涕零抱着萬才——）

寒梅：師父！——（抱着萬才痛哭起來）

萬才：（畧離開地）寒梅，呢種情形我見得多叻，一旦有咁意外嘅成功，眞係不免悲喜交集㗎。

寒梅：（哭着）唔係，師父，我覺得彩霞係有好日子過叻，可惜家俊冇眼睇，若果佢能够睇到，你話佢幾歡喜呢？