合家團圓

賓甲：（對沈氏）（口古）恭喜太夫人，壽算比南山，德高如王母。

沈氏：多謝各位賞面，不嫌薄酌，惠駕寒廬。

家俊：（白）各位飮杯，（舉杯）

衆人：飮，

金枝：（浣紗溪）街頭乞食，淚眼模糊，喚呌沿門枉……哀呼孤身飄泊，做到乞婦，捱飢又抵冷，我心实痛苦。

甲丐：（喝白）想點呀你，

金枝：（吶吶，白）無……我……我想埋去啫，

乙丐：（白）我地企處等咗半日，你想打尖，哼，開胃叻你，

金枝：（哀求，白）我已經餓咗兩日嘅叻，請各位大叔做吓好心，俾我企埋去啦，

丙丐：（白）依，你唔係李尙書個千金嚟嘅，蝦，以前你唔係出入都坐轎，前呼後擁咁嘅，點解而家折墮到要乞食咁慘呀，

甲丐：（附和，白）蝦，眞係一百歲唔死都有新聞叻，千金小姐都噲挾爛砵嘅，

衆賓：（頻稱，白）打攪晒，打攪晒，

家俊：（頻稱，白）招呼唔到，招呼唔到，

家俊：（訝異，白）依，個個唔係二嫂嚟嘅，

秀娟：（白）係呀，（叫住）二少奶，二少奶，

秀娟：（白）二少奶，乜你攪成咁呀，

金枝：（嘆息，白）唉，唔好講咯，自從抄咗家之後，無地棲身，所以流爲乞丐啫，

家俊：（薄責，白）二嫂，當日你有錢嘅時候，都係太過傲驕的嘅，

秀娟：（白）唔好講咁多咯，入去至慢慢傾罷啦，

金枝：（白）入去，我重有乜面去見安人丫，

秀娟：（白）事過情遷，安人唔噲怪責你嘅，响老人家面前認句錯就無事嘅叻，（促她）去啦，去啦，

沈氏：（白）家嫂，乜你帶個乞兒入嚟咖

秀娟：（行前，白）安人，係佢二少奶嚟咖

沈氏，家龍：（大訝，白）吓，但係金枝嚟嘅，

金枝：（行前，低聲，白）安人，

沈氏：（憤然，白）哼，你重有面來見我，

金枝：（跪下，乙反木魚）當日刻薄家姑違婦道。自知忤逆罪滔滔。還望原情息憤怒。從今不敢再糊塗。

沈氏：（十從摩）真正可惱，实在想將你斬千刀，要家姑拜家嫂，記起往時便憤怒，你真冇譜，实冇譜，當初太顛倒，將我百般折磨極氣傲。（斥白）

沈氏：躝開，睇見你就憎叻，

金枝：（凄然，白）家龍同我危吓安人啦，

家龍：（跪下，白）亞媽，（七字淸中板上句）佢雖則逆姑違婦道，一時之錯問誰無。百拜哀哀求我母。望將小事化爲無。（花下句）原宥佢年少無知，准佢操勞將過補。

沈氏：（三脚櫈下句）你當日畏妻如猛虎，孝道已全無。今日准你返家堂，都係多得你嫂嫂。忘想替他求恕宥，死危死跪也徒勞。（花）知機者快快躝開，免使娘親添氣惱。

大娘：（白）老夫人，駛也咁嬲丫，

家龍：（懇家俊，白）亞哥，唔該你帮吓口危吓亞媽啦，

秀娟：（白）相公，睇佢咁可憐，我同你開去跪吓安人啦，

家俊：（白）好啦，

家俊，秀娟：（白）阿媽，安人，

秀娟：（銀台上）莫憤怒，將佢恕一遭。

家俊：（接唱）佢往時在家太自豪……驕奢態度，立心侮家姑，狂妄任情雖則有乖婦道。

秀娟：（接唱）佢現已悟，面对家姑悔過，乞寬恕望饒二少奶，將她教導。

家俊：（接唱）我保她決心轉好，求賜護持俾使再生有路。

秀娟：（懇求，白）安人，就咁寬恕二少奶一趟啦，

大娘：（急牽金枝，白）快的去跪吓老夫人添啦，

金枝：（上前跪下，白）安人，就咁饒恕我一趟啦，

沈氏：（白）好，睇家俊同家嫂面上，就饒恕你一趟係啦，

金枝：多謝安人，多謝安人，

秀娟：（白）二少奶，我同你入去換過件衫先啦，

　　（金枝隨秀娟入）

沈氏：（花下句）幸喜一堂同聚首，更喜我兒高中耀門廬。

家俊：（接唱）循循善誘賴娘親，方敎踏上靑雲路。

金枝：（花下句）從今改過爲賢婦，侍姑寧敢怨辛勞。

沈氏：（和顏，白）係咁就好啦，

众人合唱（步步高）逢良辰，一家高慶樂也陶陶。

家俊　家龍：（同唱）樂對慈母。

沈氏：（接唱）樂對新抱。

合唱：（合唱）再歡聚，更欣幸榮獲封誥。