血書留証橋頭訴情
官：（傳令白）衙兒們，犯婦衞花愁遊街已畢，在廿四橋畔就地正法，等待午時三刻，報知本官，然後開刀！
差：（同白）得令！
甲路人：（嘲笑白）你個淫娃都抵死叻，俾個小姑發覺姦情，竟然殺死個小姑嚟滅口，而家法網難逃，有報應嘅！
女路人：（嘲笑白）呢的就係因果叻，咁狼毒嘅蕩婦影衰晒的女人呀，晤死留番嚟遮陰地皮陣！
衆：（同拍掌喎呵白）鬧得啱！鬧得着！的咁嘅淫娃蕩婦，抵辱佢嘅！
愁：我係淫娃（一才）我係蕩婦（一才）（快的的關目沉思一輪，堅决白）我唔承認！我遭寃枉，（序）
衆：（狂笑攝白）哈哈，重話寃枉喎，死到臨頭都唔知錯，抵死咯！
愁：（續唱引子）致有受災難，（序）
衆：（譏諷白）呢的叫做因果報應叻淫蕩婦，抵你殺千刀呀！
愁：（續唱歸時）枉我呼天不應收塲實太慘！（序）遭難！（曲）嘆身遭寃案，誰諒我，向天一嘆，（序）偸喊！（曲）惹禍患，怨容顏！我把誰人救挽，徧徧反累我天可鑒！（轉乙反二王合字過二板）我鋤强爲救姑，殺奸却受人彈，徧生誤會罪一滿身，誰人將奴罪挽，我被判通姦，反案實困難，淚暗彈，羸來蕩婦名，恨難將命案反，奴命似花飄泛！（低頭飮泣）
甲路人：（譏諷白）喎呵，喊就得㗎嗱，遲左叻！
女路人：（嘲笑白）喊又死，唔喊又死嘅叻淫蕩婦，早知今日，何必當初丫衰人！
（陪笑白）兩位貴差，我想嚟生祭犯婦，唔該你地俾個人情，等我送的水飯，同犯婦最後一面通融吓得唔得呀？
甲劊子：（白）好喇，現在時辰未到，咁你快的生祭一囘喇！
風：（道謝白）多得晒，唔該晒兩位，花愁！我頂埋亞蘇蝦嚟祭你呀！（解下保子）
愁：（又悲又喜白）你……你孭埋蘇蝦嚟同我最後一面呀魯伯，咁你快的俾個仔我錫啖先喇！
風：（抱保子交花愁口古）花愁，我千辛萬苦都孭埋蘇蝦嚟送你終嘅，快的錫到够喇，唔係就永遠都冇得錫嘅叻，快快趣趣將佢錫完，就食埋最後一次飯啦！
餐飯。
愁：（接保子狂吻口古）乖仔，亞媽對你唔住咯仔，你有娘生，以後無娘養，如果唔得魯伯頂你嚟送我終，兩母子就緣慳一面，你亞媽就祗有含恨落陰間。（邊錫邊喊）
風：（白）唉，唔好喊咁多咯花愁，你又喊，蘇蝦又喊，我又最眼淺嘅，有乜法子唔喊埋一份呢。（哭泣不已）。
愁：（白）唉，我估唔到魯伯你在今時此際，重會嚟見我一面，你可稱得係我衞花愁嘅紅顏知己，我今生唔能够報答你，惟有期來世，至報答你喺喇，魯伯！
風：（悲咽白）唉，有今生啫，邊處有來世丫，眼白白睇住你去，唔傷心重係人嚟咩！（長花下句）白頭人送黑頭人，流淚眼看流淚眼，蘇蝦喊時引到我又喊，佢以後後孤兒無母，我喊失紅顏，恨我吿狀幾囘，未能案反，駡一句個班盲官黑帝，受人賄賂要將你命償還。可嘆你靑春年少就要過刀亡（一才）留下你個苦命孩兒捱災難。
愁：咁求你養大我個仔啦！
風：（一才慢的的關目白）吓，叫我同你養育個仔呀？
章：（白）係，呢個須然係不情之請，亦係我一生人對你最後嘅一個請求，如果你都唔肯應承我，試問我點死得眼閉呢魯伯？（乙反木魚）正是流淚相看情慘淡，托孤任重，但願你承担！
風：（接唱）勸句花愁你無謂喊。好啦就算街頭乞食，我都願替你養育兒男。
愁：（接唱）得你仗義提携，永感恩無限。
風：（接唱）我預埋佢去乞食，都未必乞唔倒兩餐。如果乞得一碗番嚟，至多一人一啖。
愁：（接唱）雪中送炭情可見，隨恩惟待結草啣環。昔日我紅遍歌坊，誰不欲獲花愁靑眼。到今日刑塲待罪，一個個漠不相關。夫去弟離，未與我同患難。祗有你呢位白頭老叟，始終愛護我呢個苦命紅顏。
愁：（一才）恨我未完母責便要別塵寰。
風：（白）唉花愁，你無謂咁多感慨咯，所謂人生如夢，往事如烟，無謂多講咯，快的抱住蘇蝦，等我畏你食啖飯，就算死都做雙飽鬼丫！
愁：（悲咽白）唉到呢個時候就算有龍肝鳳胆我都食唔落明魯伯，等我抱住蘇蝦，見一時多一時等錫一啖多一啖把啦！（摟保子狂吻流淚白）仔呀仔，亞媽錫埋呢次，就永遠永遠冇得錫有得見咯乖仔！（哭聲甚哀）
風：（見狀同情下淚白）花愁，喊都冇用㗎，乖乖地聽我勸，食啖飯啦，做飽鬼好過做餓鬼呀笨，唔係等陣的牛頭馬面嚟接你，見你行唔起，就會難爲你，唔啱等我畏你啦，（持碗快禿頭起流爲水水行雲）你唔好喊，莫將眼涙淘冷飯！
愁：（接唱）我又嗟嘆，難得你善心祭紅顏！
風：（接唱）我畏你就要强加餐，最後呢一次食呢餐最後呢一躺擦番餐！（畏花愁食飯）
愁：（勉强食飯）
風：（續唱）喂，你要食飽佢噃，須知食飽至有力行！
愁：（接唱）摟住孩兒又再喊我把口又見淡，望你莫相强，迫我食飽監我大難！
風：（接唱）你不久到陰司去賣鴨蛋，應該家陣要食多啖，捱餓太慘，就算做鬼部免致冇力行！
愁：（接唱）我心驚惶未行刑便喪胆，所以難强飯。
風：（接唱）你休怠慢，强餐！
愁：（接唱）我感君恩厚義可讚，將蘇蝦相託
風：（接唱）怕力有限！爲佢抬共去担，就算受苦都當爲閑！
愁：（接唱）我食過呢餐，快到陰間！
風：（接唱）你莫悲哀，望你做鬼猛，等陣受一刀，要咪實眼，
愁：（接唱）摟孩兒獨怨嘆，
風：（接唱）我怨天公實冇眼！
愁：（接唱）命已不可挽，相對淚珠斷續彈！
風：（接唱）你去做鬼咪咁笨話唔食飯！（OS）（中軍喝道白）忠勇王，忠義王囘鄕祭祖，不論軍民人等，肅靜迴避！
官：（傳令白）衙兒們，聞得王爺駕到，我們先將犯婦，押過一旁，待等王駕過後才將犯婦行刑，毋得違令！
差：（同白）得令！（與監斬官同出凉亭）
風：（大喜關目白）衣，聞得王爺駕到，唔通花愁有救星，我好彩隨時隨地都袋住張狀，不若我攔與吿狀，同亞花愁伸寃都好了，着防，我幾大都唔囘避！（取出狀詞，行至路中間跪下）
搜尋資料庫
