拜雙星証盟心

瑞珠：（將瓜菓放下）我請你食野。

望兒：點解咁多野食呀？

瑞珠：今日係乜野日子呀，唔通你咁都唔知嘅咩？

望兒；我知，我日日喺鋪頭「集」數開單，當然知道日子啦，今日係七月初七丫嗎，

瑞珠；咁七月初七係乜野日子呀？

望兒：七月初七唔係七月初七囉。

瑞珠：（失笑）唔怪得父親話全間米行最勤力係你除左做功夫乜都唔理嘅又係你嘞，原來你連七月初七係七姐𧩙你都唔知呀？

望兒：七姐𧩙係拜乜野神㗎？

瑞珠：拜乜野神嘅？我同你去睇吓啦。

望兒：（愕然）同我去睇神仙？

瑞珠：你跟我來啦！

　　（望兒隨瑞珠去，至小苑天街）

望兒：呢，神仙喺邊度呀？

瑞珠：天上個條白綫俗人就話叫做天河啦，東西兩邊河邊一粒叫做牽牛星，一粒叫做織女星，今晚就係佢地一年一度相會嘅日子呀。

望兒：原來做神仙咁慘㗎，一年至能够相會一次嘅咋

　　（下接曲，兩人因談七夕韻事而道出雙方的愛念）。

望兒：（花香襯馬蹄）双星好儷影，愛心堅且勁。可惜一年一会見，天規强注定，有負仙家两心互傾。

瑞珠：（接唱）須知愛念要是有真心，就算天边遠隔亦能照应，倘使愛非有心，雖然得常聚還未有情。

望兒：玉帝居心太薄情。

瑞珠：（接唱）莫嘆双星濶別情，应惜弱女痴心相併。

望兒：（接唱）妹妹愛心早受領，应偕賦双星，只惜寒微身世不敢攀配娇卿。

瑞珠：（挿白）你咪咁傻啦，（接唱）且看牛郎織女也可結合何用嘆苦命。（挿白）：佢地重有仙凡之別添

望兒：（接唱）心中每自悲，孤兒遭困境。

瑞珠：（接唱）若能自奮，定然趋錦綉路径，（挿白）你咪咁自卑得㗎。

望兒：（接唱）深感你热情待我，若償大志當以千金报聘香車敬迓愛卿。

　　（曲終，二人依偎纏綿）

　　突聞超平聲，二人立卽分開、太羞

超平：咁就趁快叻，哈哈……

望兒：董伯

瑞珠：（嬌羞）父親偸聽人地講說話嘅！