損友設賭行騙

四喜：永楊，死佬，前世未瞓過嘅咩衰人。

永楊：（含糊地）呀——大少奶，大菩薩，我今日天光至番嚟呀大皇帝，（又睡）

四喜：（晦氣地咀咒）希，咁中意瞓又唔去棺材裡面長瞓呀。

金標：珠，珠。

四喜：做乜呀？

金標：（冷笑）我問你做乜呀，而家咁就叠埋心水做大少奶嘅嗱。

四喜：（恨恨地向着金標反駁）哎吔，你個衰人，斬犯，係你叫我跟佢番嚟大屋住㗎馬，敢你都咁講嘅。

金標：我呌你同佢番嚟大屋住，探吓佢重有乜野底，唔係叫你一直咁滾落去個噃，喺外邊住，自己地方，我見吓你重易的啫，呢度人都多兩個，呌我賣斷你呀。

四喜：（恨恨然）滾左我咁多年呀，重要同人地凑埋野仔，好想呀，邊個唔想同埋你丟左個仔去嘆世界呀，你就好似多多都唔够皮咁，重要我滾丫，我問你就眞。

金標：愛，好叻，好叻，快叻。

四喜：你就快得過啦，因住添呀，永楊而家番左嚟唔够兩日啫，嗌悶叻，沉晚已經出去玩叻，天光至番嚟，悶到我吊頸，好似坐監咁，若果俾第個黏上佢呀，最後個注就蝕埋。

金標：我知我知，咁實在佢而家重有乜底㗎。

四喜：我睇都有限公司叻，最多兩畝瘦田，俾都嫌左地方，要就係呢間地方啦，連地皮搭上蓋都値七八千嘅，其他零零星星多少野咁啦，佢好似變性咁，死擅實唔放咁嘅叻。

金標：咁剷埋呢㷛够駛啦，整埋就甚係收手叻。

四喜：出刀仔去搶呀！

金標：（一想）有辦法嘅，嗱，（附四喜耳語）

四喜：（一笑）正扭計祖宗，（推他去）去死啦，得叻。

金標：（一笑）我班定馬，（走去）

　　（四喜一想，胸有成竹地，復囘房中——）坐

　　（四喜囘房，見永楊仍高臥未醒，四喜故意下鳴咽地假哭更故意越哭越大聲，似是無限悲苦，一面偸着永楊。）（永楊似夢迺，畧有所覺，但又沉沉睡去。）（四喜故意假泣着，悲苦唱曲，意是深鎖閨中，如樊籠（唱曲中，四喜一再偸窺永楊動態，迨見其醒，更作悲苦之狀）

四喜：（焚稿詞）彷彿鸚鵡被困樊籠裡，憂鬱滿胸，独倚絳窗追憶往事，一切皆空，醉琼樓，何愉快，夜夜酒綠灯紅。殷商巨賈，揮逐裙下，爭問把纏頭奉。身心安享更骄縱。

自從下嫁朱門，困處閨中，香居羈彩鳳。怎使不悲痛。往日欢暢，今朝已成幻夢。

　　（曲終、永楊走前來安慰四喜）

永楊：愛，四喜，喊苦喊忽，嗟嗟怨怨，咁做乜啫，一晚咁多番少吓嚟駛咁嘅，難爲人地斷十幾年咁等我呀。

四喜：（故作悲苦嗟怨）邊個怪你唔番嚟啫，做左住家人應該係咁守嘅啦，有乜奇啦，不過開心大家一齊開心咁至成夫婦㗎馬。

永楊：你想點呢？

四喜：我話你有福唔會享囉，玩吓都要咁奔波出去嘅，咁好地方開番攤館都够呀，你話一聲，你慌冇人陪你玩呀。

永楊：（頓然大悟）係噃，一於大家開心，實行喺屋企開大檔。