「彩鳳喜迎春」揷曲之二

「扮美戲新娘」

時春：（白）阿姑娘，（板眼）恭喜你良緣天賜，嫁得個好郞君，今晚洞房花燭，格外精神。恭喜你白髮齊眉，兩老好福份。對住個多情夫婿，你話幾咁開心。大家相愛相憐，實在唔駛問。恭喜你夫妻和順，快活過神仙。恭喜你………（正欲說下去爲彩鳳打斷話柄。）

彩鳳：（聽得厭煩惱氣）希，恭恭恭恭乜嘢丫，我唔駛你講！（負氣行開）

時春：（故意追上前）姑娘，我地做大妗梗係講的好意頭嘅說話嘅馬，唔通你又唔想好意頭咩？姑娘！——恭喜你開葉散枝呀！

彩鳳：（更惱氣）唏—我唔鍾意聽，你唔好喺度嘞，你扯啦！（行）

時春：（追前）係，我唔會阻你嘅，梗扯啦，不過都要做埋的收尾至扯得㗎！斟杯茶俾你呀，食的糖果呀咁先，我地至扯得㗎馬！

彩鳳：（憤然走開）我唔飮，我唔食！

時春：（再追前）食，千祈唔好話唔食，食粒糖蓮子啦，好意頭噃！（彩鳳負氣不睬他）

時春：（單打地）（木魚）糖蓮子，甜到入心。食過連生貴子，雙喜來臨。（插白）食粒蓮子姑娘。

彩鳳：（負氣）（插白）我唔食。

時春：（續唱）唔啱飲過杯茶，潤吓個香吻唎。等吓同姑娘合卺，更加相愛相親。

彩鳳：（生氣）（接唱）何必喺處奄尖，我都話唔飮咯。响處慇懃伺候，瞣得你費精神。

時春：（揷白）唔飮就罷啦，嗱，唔啱食件糖蓮藕啦，（續唱）因爲蓮藕好意頭，恭祝你連年行好運。天成佳偶，聽見都開心。（揷白）重有呀，（唱）所謂藕斷絲連…………（彩鳳突有感觸）

彩鳳：（食住插白）吓，藕斷絲連！

時春：（續唱）做乜你聽到藕斷絲連，你就心驚震。唔通別有情絲未斷，掛念住個情人。（彩鳳心絃爲之一震，霍然囘頭，由上望到下發現時春男裝鞋一驚）

彩鳳：（白）吓，你呀，吓，點解你會咁樣嚟㗎？

時春：（憤恨）（白）你重問我，原來你平日對我所謂情，所謂愛，冚崩冷都係呃人嘅，你講啦，你對唔對得我住！

彩鳳：（滿腔委屈）（乙反中板）一語倍櫻心，知否我斷盡柔腸，何苦再橫加，詢問。

時春：（接唱）今晚燭影搖紅，你正喜洞房春暖，我才是悲憤，難陳。

彩鳳：（接唱）委屈有誰知，苦鳳有誰憐，我比你更多，愁恨。

時春：（接唱）鴛侶屬他人，情天留缺憾，你問心難對，舊情人。（轉士工花）枉我宵宵亭畔候娥眉，恨你有意負情心太狠。

彩鳳：（悲酸地）（接唱採花詞）我對你一片眞心，奈何父母迫婚。

時春：（接唱）□寒盟，竟爾另婚嬪休說以往情份。

彩鳳：（接唱）我情愛深。

時春：（接唱）我愁深怨深。

彩鳳：（接唱）請君休怨恨，我未變心。

時春：（接唱）你盲心更負心。

彩鳳：（接唱）悄然爲釋我郞恨，甘心一刎棄俗塵。（彩鳳擬以首觸牆，時春急攔阻）

時春：（白）喂喂喂，何必要犧牲呢，（士工花下句）我不過出言相試，又何必太過認眞。聆嬌一語去疑雲，只恨天心何太忍。

鳳：（長嘆一聲）唉！（西皮下句）暗怨老爹心太狠，不能遂我心。

時春：（接唱）結同心那堪再問，厠身洞房，心有餘憤。

彩鳳：（接唱）紅淚滿襟，暗斷魂。

時春：（嘆息）唉！（接唱）凄對佳人。

彩鳳：（凄凉白）唉！我條命都苦咯。（凄然投入時春懷抱中）（時春抱住彩鳳難過。）