聖旨爲媒天賜良緣

周元：（心聲）（長句花下句）低首自沉思，心中無主意，一紙書函求親事，又驚又喜又懷疑，莫非良緣天所賜，豪門淑女配痴兒，誠惶誠恐到侯門，尷尬異常難啓齒。

周元：（白）和伯，周元有禮有禮，

門公：（白）衣，周元，點解你咁大胆由正門嚟呀快的返去後門啦，

周元：（白）和伯，我今日唔係嚟賣柴，所以……

門公：（譏笑白）你唔係嚟賣柴嚟收租呀？

周元：（白）嗯，點敢，不過我今日因爲有多少事想見吓你老爺啫，

門公：（一才愕然白）吓，你想見我地老爺，（仄才冷笑）周元，你係乜野身屍蘿蔔皮呀，我地老爺點會見你呢種貧賤之人嘅呢，快的走罷啦，

周元：（陪笑白）和伯，）你唔知叻，因爲有一位响京師嚟嘅官人，呌我帶封信俾你地曹大爺，所以我至敢胆由正門嚟啫，

門公：（白）哼，我都話你顚嘅，就算有書函亦都唔會用到你送嚟啦，你總唔自量吓嘅，

周元：（白）和伯，眞㗎（取信出）拿，呢封信寫明交俾你老爺收嘅，多煩你代我通傳一聲啦，

門公：（白）周元，我睇你今日語無倫次咁樣，梗係想挨打定叻，究竟乜野信，快的俾我睇吓先，

周元：（交信門公白）嗱，和伯你卽管睇淸楚蝦，

門公：（接信畧看，表輕視）（白）哼，都唔知邊個寫嚟嘅，企响處等陣啦，

周元：（誠惶誠恐地白）唔該，唔該，

門公：（趨前白）啓禀老爺，斬柴仔周元送書到來，現在門外候見。

曹傑：（愕然白）。蝦，斬柴仔周元，（仄才關目）

門公：（呈上書函白）書函在此，請老爺過目，

曹傑：（接信一望，愕然讀白）錦繡皇封，（重一才乜野書函呀？

慢的的驚惶地白）唉乜，原來係聖旨到，人嚟，快些安排香案迎接聖旨，

曹傑：（丁跪讀白）昨在荒山迷路，借宿無由，幸樵子周元，留居茅舍，朕見其家貧親老，盡孝甘貧，謙敬待人，可嘉可憫，以彼聰明英俊，尙未成婚，知卿家有掌珠，東床堪選，特意爲媒撮合，共賦鸞凰，幸母輕視布衣，勿寒微見棄欽此欽遵。（讀畢沉花下句）唉吔吔，果然是煌煌聖諭，今我魄蕩神馳。（續唱花下句）呌家丁（一才）立卽大開中門，恭迎欽差駕至。

家丁：（白）大開中門，

曹傑：（口古）不知欽差駕臨，老夫有失遠迎，望祈寬恕。

周元：（一才愕然地）（口古）曹老爺，乜你咁客氣呀，小子不過係山野樵夫，何們你竟以欽差招待，眞令我滿腹狐疑。

曹傑：（口古）周元兄昨日聖上迷失路途，蒙你留駕有功，現在聖上是否在仍然在你家居住。呢？

周元：（一才驚白）下，乜原來佢就係皇帝嚟咩。

曹傑：（白）冇錯，但就係當今正德皇叻。

周元：（恍然地口古）哦，小子眞係罪該萬死，竟不知聖上駕到，太過忽畧禮儀。

曹傑：（白）不知者不罪，聖上斷唔會怪你嘅，（花下句）今日聖旨爲媒求婚配，命我女兒許你結蓮枝，不過……（一才）

周元：（揷白）不過乜野呢？

曹傑：（續唱）嗯，不過婚姻大事非等閒，還須考慮週詳方爲是。

周元：（白）係嘅，係嘅（花下句）令媛賢良人讚羨，周元早已慕芳姿。幸蒙聖上賜隆恩，萬望老爺成美事。

曹傑：（白）咁呀，（仄才關目）（口古）好啦，旣然不棄小女柳質蒲姿，且待老夫揀個吉日良辰，再通知你到來迎親，共諧好事。

周元：（大喜口古）多謝老爺垂靑眼，小子還須囘去禀吿家慈。