寶玉哭晴雯

　　情愁困，憶晴雯，你睇月黑星稀雲影暗，正是從前恩愛，今日化作烟雲，晚涼風，吹陣陣，陣陣陰風寒風透骨，攪到我當堂打冷震，呢個相思人，悲難堪，正是情已盡時亦難再搵，所以更深人靜訪幽墳，不覺依稀行近，猶自悲，一自你死落陰曹，我尚在人間，陰陽阻隔　唉她噯，令我暗自傷神，此後就難親近，你話怎不傷心，正係一思量處一銷魂，憶自與妹同遊，大家常親近，姐你嘅年華得二拾歲，你亦也曉解情深　有陣在花前我讚你生艷韻，重愛姐你盈盈秋水可爲神，記得撕扇與共補裳，你真是情太甚，姐呀重怪郎話我對你未情真，恨只恨個一個襲人，佢都是心太狠，可憐姐你一命化為塵，地位都兩相分，又恨我未能完責任，只恨高堂將你驅逐了，個陣挽救無能，姐你病榻纏綿，都試有誰過問，又恨我護花無力，都真係枉爲人。憐姐你落魄窮途，都真係可憐可憫，更憐姐你上無親故，下未有親朋，此後靜院風流，難再玉人與玉人親近，做乜眼花僚亂，乜又似覺飄蕩神魂。