雪夜訪情僧主題曲

何非凡

秦小棃

劉克宣

合唱

梨：（小曲風凄凄）「引子」

風凄凄雪迷迷　凄凉怕見夜色迷　悲難計　愁難計

悲愁怨恨無情婿　蘭閨冷落憑誰慰

奔馳夜路覓夫婿　寒山寺請夫君　重囘俗世

　　宣：小姐，我行到脚都跛喇，氣又喘，心又翳，風又大，雪唔細，凡哥參禪嘅地方，前面個間就係，你去將佢跪，我廢事阻你兩公婆傾密偈。

　　梨：咪咁抵死喇，肥鬼，（行）

　　凡：（矇瞹）禪堂深處念菩提，門外風雪頻送徒惹情自迷，心記憶舊恨倍悲凄，舊事似烟愛夢全逝，嘆罪孽太重了立心要淸洗，（白）阿彌陀佛。

　　梨：（賣相思）細聽誦經聲，似足夫婿，我相思呀，今晚夜訴齊，最怕佢無情，委屈嬌妻，我要用計圖謀，佢定必出嚟，（敲門）（白）大師開門喇。

　　凡：（二王）雪雨凄風，忽聽扣門，聲細。（唱序）悲聲殊慘厲，（曲）已經更深寅夜，究竟是誰個，到嚟。（唱序）令我意亂又神迷，（曲）聽真佢，（序音樂細聲）

　　梨：（又敲門）（插白）大師唔該你開門喇。

　　凡：（接唱二王）好似瀝瀝鶯聲。（序音樂聲細）

　　梨：（插白）大師做吓好心救吓我喇。

　　凡：（接唱二王）呼喚我開門，將佢救濟。（唱序）凄酸撩腑肺。（曲）唯念出家人，總之不理不理，不理，任佢　悲啼。（拉收腔）

　　宣：（咸水歌）你係女人敲寺門，一定俾人抵制呢姑妹，邊處有咁多情和尙，你都唔駛嚟。（白）扯罷喇。

　　梨：（怒目擠手止宣不可出言唱昭君怨）令我令我淚悲啼，我遊行曠野，遇雪伴侶亂散歸，衣衫濕晒，令得我難爲，冷透心肺，神盡廢，好心救濟，開恩救濟，大師方便我一切。

　　凡：（接）佢嬌呼救濟，出家應該方便，免她受慘凄，（欲開門忽聞梨聲認得是梨）

　　梨：（白）係囉，快的開門俾我啦。

　　凡：（接）吓佢嘅聲音乜似足是我妻，但係嚟就最弊，（序）我去窗口看眞。是否我妻到來。（行開窗口見梨）嘩我要避免佢纏擾施妙計，堅决絕伉儷。

　　梨：（白）呀也咁耐都唔開咖，（連環扣）又再用語詭多的，肚又餓，大雪風寒，寸心刀剌，望你慈悲存心來護庇。（序）

　　凡：（接唱）你莫再恨怨僧不依，佛地空門，分淸瓜李，豈可收留殘更獨女。(序）

　　梨：（接）嘆凡哥凡哥，你可知是梨妹寒宵來會你，（序）爲郞暮與朝相思，望求續愛絲，慰心痴。

　　凡：（流水行雲）情可怕，熱戀更是如夢話，我盡睇化，從今誓擺脫繁華。（序）

　　梨：你爲乜嘢要出家。

　　凡：我爲失意着袈裟。

　　梨：我爲你牽掛內心緖如麻，你無情便去也。夫妻恩義看化，覓千遍，覓君再種情芽。

　　凡：皆因當初我確做差，刻骨相思種下。

　　梨：你毋謂記她，與你共返再享繁華。

　　凡：我出家人，四圍是我家，情已盡化烟，愛念更寡，傷心世事險詐。出家往事作罷，自甘素餐淡飯與淸茶，

　　梨：好心你咪出家，與我歸家。

　　凡：念金剛，我盡參化。

　　梨：我父親恩你應念吓，紅兒又要掛。

　　凡：重提最怕，我絕無牽掛，願嬌再抱琵琶。

　　梨：啋，乜你亂講侮辱奴說話。

　　凡：（訴寃中段）駛乜亂咁啋，我堅决，敲經今世別情愛。

　　梨：你絕情負奴實太不應該。

　　凡：你算我負情，我願憑佛法消災。

　　梨：今晚害得我捱盡風雪，又若令我去斷頭台。

　　宜：（咸水歌）算你企到脚跛人家都唔秋唔啋姑妹，無為痴心成咁，挨極都唔會返來。