芙蓉帳暖度春宵
精彩曲詞
偷窺宮主驚艷影
闖駕無端罰情郎
（棋局形成馬後炮雙車將之勢，玉崑無法可救）
了因：（笑着）哈哈，公子，呢一局又係貧僧佔先啦。
玉崑：（意欲圖賴不去）君子讓頭盆，勝敗乃兵家常事，再嚟。
了因：噯，公子，宋太祖也是爲了一局棋出賣華山，公子聲明過輸一局就要走，讀書人焉可食言而肥呀，都係請囘啦！
玉崑：（仍不欲去）唔通大師多下一局棋都唔賞面？
了因：非也，宮主聲明午時到寺，現在已時都到叻，倘若宮主嚟到，犯了闖駕之罪，不但公子難以担當，貧僧亦有干連呀。
玉崑：（賴無可賴，不得以吿退）旣然咁，弟子只有吿退！（玉崑正欲退出，頭陀慧明匆匆來報，慧明是個粗眉濃目，身裁魁梧的戴髮修行頭陀——）
慧明：師父，宮主車駕已經嚟到山門外面，師父快的出去接駕啦。
了因：（聞報失驚）吓，宮主已經嚟左呀？（向玉崑）公子，今趟你想走都唔得叻。
玉崑：（微笑）唔走正好呀。
了因：乜正好呀，呢次一定要你屈駕迴避，慧明，你帶公子到藏經閣上暫避，切勿離開公子半步，公子，你千萬唔好落嚟呀。
玉崑：弟子遵命，唔會難爲大師嘅！
慧明：公子請。
了因：宮主蓮駕光臨，貧僧接駕來遲，死罪，死罪！
宮主：免禮！
了因：多謝宮主，請宮主到大雄寳殿拜佛進香！
了因：請宮主炷香。
（宮主拈香揖拜觀音像旁邊，玉崑着上了頭陀的衣服，手拈塵拂，托楊枝甘露瓶扮善財童子神像，動也不動站着）
（宮主見已上香，跪下拜神禱吿）
宮主：（唱燒香）
信女白蓮
還願上淸香
叩謝神恩如海樣⋯⋯⋯呀平
寇亂靖國邦庇佑父皇母
后福壽綿長呀紅
絲牽一線謝上蒼
我選得好檀郞盼望駙
馬爺情如張⋯⋯⋯⋯敝貌若
潘安夫婦白
髮情⋯⋯⋯⋯⋯長。
（宮主禱拜時，玉崑驚其艷，暗喜，隨卽木然反應）
（玉崑被香烟昏得辛苦極，强爲忍耐，香烟越來越多）
（玉崑被香烟昏得忍無可忍，猛打噴嚏，用手掩也掩不來，楊枝瓶塵拂跌落，狼狽不已）
（公主聞聲乍爲抬頭，驚見菩薩是生人，駭然嘩的一聲叫出，跌坐地上，淸儀速忙過來扶住，衆侍從哄動不已）
宮主：（驚叫）刺客，捉住佢，捉住佢⋯⋯
淸儀：（向宮主）宮主受驚，刺客已經捉到嘑。
宮主：（上前向玉崑申斥）哼，你都眞大胆嘑，（走馬尾段）你無故自埋藏，擾佛堂，實心喪，有意化裝窺哀家，我還願進香，嚇煞哀家，喪魂兼魄蕩，你行動鬼怪，實難體諒，蝶蜂叢狂，行爲放蕩，聖上有明文，御賜金牌，庶民迴避命多罪狀，你立心不良，應該立卽身喪，（白）推出斬。
（御林軍群應命）
玉崑：（白）慢慢慢（凱旋一段）
宮主先息雷
霆
莫將我
來命
喪望
你輕輕
便發
放
朝庭自有皇法偷窺宮主未必要
身喪。
宮主：（憤怒）金牌在我手中，要斬就斬，不用多言，推出去。
了因：（叫住）慢慢慢，宮主，當今聖君賢明，萬民歸心，若宮主對此人才加諸罪，便要誅斬，誠恐萬民怨唱呀宮主。
宮主：此人藏匿闖駕分明爲非作歹，圖謀行刺本宮主，難道還不應問斬咩大師！
玉崑：哈哈哈，人道當今官主賢明一如聖君，原來聞名不如見面，眞係一代不如一代！
宮主：（更怒）吓？你敢侮辱本官主添呀？我點樣不够賢明呀，好，等你講清楚再殺你，你講。
玉崑：我梗講（中板上句）宮主是聰明人，我何賞作歹爲非，加罪要有証明，方能成罪状。我不過扮菩薩，你話我行刺，我身上何曾冇帶，刀槍。不過打乞嗤惹下殺□罪名，死得眞係凄凉，寃托。枉聖上愛民若赤，宮主你草菅人命，怎能算得，是賢良。（花）宮主呀，你要禁盡天下人打乞嗤，我就死而不枉。
玉崑：（更侃侃陳詞）宮主，世間上只有劏鷄殺鴨唔駛講理由嘅啫，殺個人都要理由卦，若果宮主自認昏傭殘暴毫不講理嘅，要殺就殺啦，否則都要講吓理由好呀宮主。
宮主：（憤然訴之）哼，好一張利咀！
玉崑：（微笑）不敢，不過講理由啫宮主。
宮主：咁你假扮菩薩，將本宮主恐嚇又有乜理由，快的直奉上來。
玉崑：宮主，你的御林衞士緊緊捉住我，點能够暢所欲言呀，雖有理由亦都講唔出噃宮主！
宮主：好，我四圍都是御林衞士，諒你插翼難飛，放開佢，睇你又點講。
玉崑：多謝宮主。
宮主：你快的講出你嘅理由出嚟，若有半句胡言，定當問斬。
玉崑：（長二王下句）宮主花容月貌世無雙，舉國臣民齊景仰，遠勝沉魚西子，落雁王嬙，獨惜彩鳳寄深宮徒令痴懷渴想，寒生寺門遊玩，不及迴避，迫於隱藏，（唱序）何嘗立心有不良（曲）令到鳳駕虛驚，望宮主原情海量。
（宮主聞玉崑讚其美艷，暗露喜色，旋又故作莊嚴之態的反應）
了因：宮主，此人固屬狂妄，本係罪無可恕嘅，但係對宮主敬仰渴慕之情，溢於言表，以其誠亦足可原諒嘅，不如請宮主從輕發落罷啦。
宮主：（色厲內荏白）從輕發落，（頹頭昭君怨）唔得，唔得，小子闖駕，眞好胆量，罪要問斬應當。
玉崑：（接）唔好，唔好。
宮主：（接）哼，偷窺上香，藐視聖旨皇皇，越禮狂漢應警戒，焉可赦罪狀。
玉崑：宮主（花下句）賢者自有容人量，殺人喪德，恐防盛譽有傷。行仁政不施酷刑，偷看花容，無傷威望。
宮主：本宮主係玉葉金枝，俾你偷窺分明有損尊嚴叻，點可以重講無傷威望呀。
玉崑：當然無傷威望啦，大有理由㗎宮主。
淸儀：宮主，旣然佢又話有理由，等佢講出嚟再加懲處都□遲呀。
宮主：（故意）唔准再講。
玉崑：宮主，若果我講出嚟唔啱嘅，宮主再加我以罪，足以表示宮主賢明，若果唔俾人講明就加以懲罰，宮主就俾人話是非不察㗎嘑，唔知宮主究竟係賢明抑或是非不察呢？
宫主：（無奈）好，准你奏！
玉崑：宮主容稟，小民可以打個比喩呀，（三脚櫈下句）花開狂蝶戀，花嬌艷如常。愛月夜眠遲。多添月明亮。庶民窺彩鳳，何損俏姑娘。（花）未嘗有損害尊嚴，絶對有理由，並非空口講。
宮主：（聞言愛其才，轉身自忖長花下句）舌燦蓮花少年郞，滿腹經綸才學廣呀，獨惜行爲太放蕩，芳心未忍他命亡，佢罪惡胎彰難原諒，我要嚴爲懲罰，警戒佢越禮荒唐，仔細思量，不知將他如何發放。
淸儀：（上前相勸宮主）宮主，今日選得（下西岐）駙馬酬神來上香，我佛慈悲不殺傷，你若殺小書生，恐防惹禍殃，（指崑）實在佢份難見諒，念在有才就恕他一趟，睇佢貌以純良。
宮主：（猶疑）恕他一趟。
了因：（也上前相勸）宮主，佛本慈悲，莊嚴佛地，不宜檀開殺戒，請宮主法外施恩，貧僧感同身受。
宮主：（同心轉意）好，看你兩人面上，姑且恕饒一次。
玉崑：（大喜）多謝宮主洪恩。（拜揖欲行）
宮主：（喝住）馒行。
（玉崑站着不去）
宮主：我只話將你死罪饒恕，並不是將你放走。
玉崑：任從宮主處置。
了因：宮主旣有汪涵海量，不若看佛爺面上，開釋他便是。
宮主：唔得，我怕他睇過本宮主之後，口舌乖張留爲話柄，死罪可饒，活罪不能免。
淸儀：咁宮主要對他點樣處罰呀？
宮主：（三脚櫈下句）他偷看本宮主，邪念繞心腸，此等好色之徒，應要修心來靜養，罰佢報恩寺內，長日對經堂。（花）削髮爲僧，一世做個燒香和尙。
玉崑：（沉花下句）唉吔吔，我願一命辭陽。（白）宮主，罰我做和尙不如殺左我罷啦。
宮主：（冷笑）哼，你呢種人，你要死我又偏偏唔俾你死呀，不准再奏，主持。
了因：貧僧在。
宮主：我將呢個犯人交俾你，將他看管，立刻削髮爲僧，如有徇情賣放，爲你是問。
了因：貧僧遵命。
宮主：打道囘宮。（衆御林內監應傳呼）
了因：公子，乜你搵的咁嘅野嚟攪呀，唏，嚇煞老僧呀。
玉崑：大師，咁而家冇事啦，弟子吿退叻。
了因：（大驚將他拉住）喂喂，公子，乜你走呀，千祈唔好呀，宮主將你交付與我，你走左，宮主降罪，怕連我呢個光頭都難保呀。
玉崑：你放心啦，你叫我走我都唔走。
了因：慧明，點解你會攪成咁呀。
慧明：呢，就係張公子將我綁住，除晒我的衫。
了因：（大爲激氣）唏，公子乜你攪成咁呀，頭先若果宮主一意孤行，怕你連命都難保呀。
玉崑：（一笑）我唔怕嘅，宮主今日係因爲選得駙馬前來進香，假如佢殺左我，佢就呢世都唔駛嫁叻。
了因：點解呀？
玉崑：我就係佢父王選得嘅駙馬。
了因：（愕然）？原來你就係駙馬呀？咁宮主要你削髮為僧點呀？
玉崑：（一笑）為僧就得，削髮就千祈唔好，宮主交個和尙俾你就容易，問你攞番個駙馬就難啦。
玉崑，阿爹。
（秉忠行前大責玉崑）
秉忠：（木魚）唏，玉崑，你眞好胡混，想偷看宮主太囂張，睇你不僧不俗着的咁衣裳。
玉崑：（接）你當日應允孩兒，娶妻先看相，若得孩同意，然後共訂鴛鴦，我到此爲履行諾言。
秉忠：（接）宮主並非平民一樣㗎，快些隨父囘家往，若然闖駕，罪大非常。
玉崑：宮主我已經見過叻，但我不能返去噃，爹。
秉忠：點解呀。
玉崑：就因宮主話我偷窺，處罰我做一世和尙。
秉忠：吓，咁點算，不日你嘅吉期已到，你做和尙點樣成親。
玉保：（憤怒）哼，個個宮主咁横蠻都得嘅，等我同三弟闖進宮門，執住宮主質問過佢。
秉忠：（訴喝）畜生，你想作反呀，住咀。
（玉保不敢作聲）
玉崑：（微笑）我而家覺得做吓和尙重好呀。
秉忠（急），點會做和尙重好呢？
玉崑：阿爹，（新對花）我心憂宮主囂張，對父難盡婦德驚慌，更恐對下用權難孚衆望，他朝到家中，興波浪，必須挫她威風，減她聲望。
玉佳：二哥講得啱叻，爹，功勞大得過郭子儀咩？個仔娶宮主都要受氣呀，落吓佢威，等將來唔好咁受氣呀。
秉思：（沒奈何地）咁就冇事搵事嚟做啦，一到吉期，你叫我點樣做人呢？
玉崑：阿爹，你唔駛担心，我當然有辦法㗎。
宮主扮花女
勸夫訂鳳凰
（玉崑僧衣，由寺內出園中）
玉崑：（流水南音短序）無端掩入胭脂網。驚鴻一瞥惹禍殃。可恨刁蠻彩鳳，一片鐵石心腸，辜負了大好春光，冷落了芙蓉帳。我不是甘爲薄倖呀，有心挫折紅粧。怕只怕弄假成眞，良緣成絶望，我萬難捨却，個一個美艷妻房。（爽）愁對名花添惆悵。嬌花辜負蝶憐香，花若有情將蝶訪，（慢）將蝶訪，且看多情粉蝶，憶花如狂。
（宮主手上挽着的花筐，喬裝成一個賣花女）
（可憐的秋香短序，食住上下兩個鏡頭）
宮主：（可憐的秋香）
難了相思賬拋珠釵脫紅裳，幻
成素衣裝，降貴規勸駙馬化作花女心中有
主張，盡哀家芳心一縷情動我夫訂鳳凰。（高聲叫）賣花唎，賣花唎。
（宮主一面高叫賣花，一面至門前，向內窺望——）
（玉崑滿懷心事，默默無言，呆望枝頭的花）
（宮主望見了玉崑，歡喜俏皮地自語——）
宮主：（自語）哎吔，眞係成個和尙咁個禍，唉，你都算攞嚟賤咯，點解有上苑嬌你不愛，偏愛佛前素花丫！（一想，胸有成竹地自語）好，你個人就似和尙叻，睇吓你個心似唔似和尙至得。（輕輕推開短門行入園中去）
（宮主行入，在門前高叫賣花兩聲，一聲暗窺玉崑的反應）
宮主：（叫）賣花唎！賣花唎——（拖長聲氣的叫）白蘭花玟瑰花唎！
宮主：（見他不理，自語）哼，連雙耳都食埋齋嘅，我又唔信！
宮主：（嬌聲叫）賣花唎，有合歡花賣！
玉崑：阿彌陀佛！
（宮主無法，再繞到他那邊去，同樣的叫着向他挑逗——）
宮主：（嬌聲叫）賣花唎，有並頭花唎！
玉崑：（合什不理）阿彌陀佛！（走開）
宮主：（爲之激氣，自語）吓，成舊木頭咁個喎，唔通眞係食左兩件豆腐潤連個心都變埋和尙嘅？好，你唔理我，我係要你理我呀！
（宮主一想，故意行前，一面高叫賣花，一面若不經意的倒身向玉崑走過去，詐作無意的向他一撞——）
宮主：賣花利，——賣花利，——（一撞）
（宮主向他一撞，故作失聲叫出，並繼而媚態的嬌笑向他挑逗——）
宮主：（故作驚叫）哎吔！——（嬌笑）撞倒個和尙添，唏唏，哎吔，眞係唔好意思，對唔住呀和尙！
玉崑：（一樣合什不理）阿彌陀佛！（竟又行去）
宮主：（更爲之失望自語）哎吔，死叻，今趟唔通做左和尙頭呢，——唔係嘅，詐正經嘅啫，出埋最後
呢樣八寶！
（宮主再行前去，又再嬌呼賣花而向玉崑一撞，並作立足不牢，一個拗腰，跌倒在地上——）
宮主：賣花利！賣花利！（行前故意一撞，並故意作立足不牢倒在地上）哎吔！——（坐地不起大叫）
哎唷⋯⋯哎唷⋯⋯痛死我囉⋯⋯
玉崑：（見宮主跌倒，不能不理，稍讓他）阿彌陀佛！
宮主：（媚態地故作嬌嗔）佛佛佛，鬼同你佛咩，佛要食元寳臘燭㗎。（雪雪呼痛）
玉崑：姑娘，你今日嘅生意一定好差㗎嘑，左又撞倒個大頭和尙，右又撞個大頭和尙，撞倒師姑和尙呀好唔利市㗎！
宮主：（仍坐在地上，媚態地）唏！人地認和尙你又認和尙，你邊度似個和尙呀？（又故意大呼叫痛）哎唷，痛死我咯。
玉崑：（一派和尙口吻）喂，姑娘，亂講說話罪過㗎，貧僧由頭到脚成個和尙啦，點解你話我唔似和尙都有㗎，開講都有話和尙唔識人，人識和尙丫馬，你連和尙都唔識，阿彌陀佛！（欲行去）
宮主：（急叫住，玉崑止步）喂喂喂，和尙呀，——
玉崑：（囘頭）做乜呀？
宮主：（撒嬌）哎唷，你撞跌人，又唔扶番起人地個喎，我唔制！哎唷！
玉崑：阿彌陀佛，我係出家人嚟個噃，點可以沃手沃脚扶起你㗎姑娘？
宮主：哎吔，你重話出家人添咁忍心嘅，我喊啫！
玉崑：話之你丫，喊我都唔扶嘅叻！
宮主：嗱，你係唔係眞係唔扶㗎？
玉崑：和尙唔車大炮，唔扶，唔扶。
宮主：嗱，你唔扶我叫㗎，我大聲叫和尙調戲我！——
嗱，（故作大聲狀）和——
玉崑：（沒奈何地）喂喂喂……我怕你叻，俾人聽見唔得了咖，好，好，我⋯⋯扶你喺呢！
（玉崑伸手拉她起，宮主乘機向玉崑投懷依偎——）
宮主：哎吔，和尙哥，你眞係好心嘅啫！（放盡媚態）
玉崑：（卽莊重合什）唉吔吔⋯⋯罪過，罪過，阿彌陀佛，阿彌陀佛⋯⋯
宮主：車，咪開口又佛，埋口又佛叻，佛係西天，冇你咁得閒呀！
玉崑：阿彌陀佛。
宮主：又佛囉！車，你估叫多兩聲佛就似和尙嘅利咩？
玉崑：噯，乜似和尙呀，直情成個和尙啦馬。
宮主：我成日都話你唔似和尙個咯。
玉崑：我話你冇理由。
宮主：我梗有理由呢！（長句二王）你似臨風玉樹世無雙，瀟灑風流人倜儻，堂堂相貌，應該要伴君王，莫非你富費榮華唔願享，長對紅魚靑罄好孤寒，問一句漂亮大師，何故要出家，做和尙。
玉崑：（序）阿彌陀佛，無謂講。
宮主：（曲）莫非你科塲失意卦。（半句）
（王崑搖頭）
官主：（半句）你一定失意情塲。
玉崑：（序）何必問短又問長。
宮主：（曲）若不是太上忘情，何必冷鴛鴦，錦帳。
玉崑：（越就越憤激）（反線中板下句）說甚麽，忘情太上，恨煞你等無義，姑娘。
（宮主暗笑）
玉崑：（續唱）可恨女兒心，冷酷無情。
宮主：（接）累你披上袈裝爲和尙。
玉崑：（白）係叻，（接）怪不得古語云，天下婦人皆可殺，女兒性似，虎狼。（花）我甘願棄駙馬尊榮，（介）一任她冷落芙蓉帳。
宮主：（故作驚訝）哎吔，原來你係駙馬爺㗎？
玉崑：好話叻！
宮主：咁你就攞嚟賤嘑駙馬爺。
玉崑：你哋女人梗爭番女人咯。
宮主：乜叫做爭呀，你咁樣對宮主重使食齋嘅。
玉崑：點解呀？
宮主：（二王序）駙馬爺，你可眞是良心皆喪，宮主生得嬌美端莊，品性賢良又慈祥，你無情負美人？將宮主寃枉，無義漢。
玉崑：（亦憤然）吔吔吔，你重帮佢，你咁緊張唔通你係宮主呀？
宮主：咪理，咁鬧就唔啱。
玉崑：（憤激）我點止鬧呀，我打佢都敢呀！
宮主：（憤極）乜野話？宮主你敢打？
玉崑：（憤極）乜野宮主呀，我當佢係老鼠。
宮主：（憤然，忘形地揭開帽子頭巾）我話你至係老鼠！你敢打！
玉崑：（仍不覺憤然）打就打啫，你估我——（轉過來，定睛一望，認得是宮主，愕然）吓？——
宮主：（憤極）我殺你，連本宮主都敢鬧！
玉崑：（轉而冷笑）哦？原來你！眞想唔到呀，宮主金枝玉業，點解扮到賣花女到和尙寺呀？
宮主：（先語塞，後憤然）呀⋯⋯你咪理啦，我嚟⋯⋯嚟⋯⋯
玉崑：（滋油狀）嚟做乜呀，宮主都要扮鬼扮馬嘅咩？我以爲淨係我地至會扮菩薩睇吓宮主嘅啫，宮主都會扮賣花女想嚟睇吓和尙呀？
宮主：（被玉崑激得憤怒極，擺出宮主架子大喝）多咀！我嚟睇吓你係唔係遵旨安心做相尙囉！
玉崑：（毫不畏懼，冷笑）哈，我睇唔係咁樣卦公主，你嚟做乜野，我知！
玉崑：（秋水龍吟）
因爲佳期空過你神志喪，枕冷
矜寒內心復愴傷偷偷自想悔已狂妄求夫
君晋宮榮華共享。
宫主：（接）
你眞妄想你焉有福呀份受享喞。
玉崑：（接）
我經已决心出家了孹賬，等你守生寡
，下半生倍斷腸。
宮主：（接）
抵你一世孤寒對佛前上香不知悔過認
眞霎戇。
玉崑：（接）
你罰我罪有罪在化裝啫，你裝賣花姑娘
也身膺罪狀，宮主你居然會和尙論法應該
殺立刻要命亡。
宮主：（接）
不知羞慚胡言亂講。
玉崑：（接）
國王犯法與平民同罪降若果我爲駙馬你定
然是聽殃。
宮主：（接）
面奏父王請求將你來命喪
玉崑：（哈哈大笑）哈哈哈⋯⋯好到極丫，請宮主卽刻番去奏！
宮主：（憤極痛哭）好，你咪咁得意，我奏請父王殺開你七碌！
了因：宮主，宮主，——（埋怨玉崑）唏，乜你咁㗎駙馬爺，一個人得些好意須囘手啦，佢已經嚟跪番你咯，重想點呢？
玉崑：（倔强地）佢唔係算𠱓我呀，想嚟試我，等我認低威之馬，我當然唔忿格！
了因：何必呢，咁你實在對佢點樣心意丫？
玉崑：（說出衷心話）其實我就好歡喜佢嘅，不過，我唔中意佢沃的使宮主嘅權威，擺宮主嘅架子啫。
了因：咁佢的確係宮主嚟丫。
玉崑：但係我同佢係做夫妻呀，若果佢一世係咁，不但止我唔受得，我一家人都受氣，乜都係假，所以我一定要屈吓佢，挫折佢，然然至肯同佢成婚，否則寧願一世做和尙。
了因：至怕佢番去奏俾聖上知，連個頭都保唔住，就想做和尙都唔得要做鬼呀！
玉崑：（倔强地）我唔怕，睇佢點奏法。
（了因搖頭嘆氣）
搜尋資料庫
