挿曲之一

求神作福

梁醒波鄧碧雲合唱

（義嫂隨白銀入，見林珠跪地拜神）

林珠：（女人）菩薩顯聖（雙）等我今年添丁，菩薩顯聖（雙）我眞心尊敬，嗱嗱上息香，敲靑磬，虔誠獻上大餅，菩薩你吃過後，要熟吓性，你濟世爲懷我眞感銘。（序中叩頭介）望你降神靈，等我時常知醒。（序）望你指吓點，等我更加聰明。（序）我愛自由，唔願人揪秤（序）所有神靈前來吃糕餅啦，必須公正，求祈咪當我做亞丁，臨瞓個陣時，我再共你傾，我拜過神靈心高興。

義嫂：（減宇芙蓉）珠叔你對神靈，可算深厚敬。

林珠：（序白）哦！呃的小意思啫（曲）我唔止對神孝順，待老婆重好熟性，（欲起身）

白銀：（序白）唔准起身（曲）你知否罪大如山，將你罰跪來示儆。

義嫂：（序白）哈哈，當日薛丁山就係咁嘅叻（曲）你又何必難爲佢，佢聽話又聰明。（林珠啼笑皆非）

白銀：（序白）唔罰吓佢點得呀（曲）你地蘇老師乜重未番嚟。（半句）

義嫂：（接半句）咁至等到我長咗條頸。

林珠：（序白）你睇人地義嫂幾好呀。

白銀：（序白）多事。

義嫂：（曲）家陣時重心掛掛，我亦唔阻你地傾。

（義嫂辭出）