「紅粉多情」插曲之六

對唱諧劇講古仔　朱頂鶴撰曲　鄧寄塵白雪仙演唱

「鄧寄塵講三個人聲：父、幼子、幼女」

「白雪仙飾大家姊」

子女放學歸來——

（子白）爸爸、家姊。

（子女白）我地放學喇，爸爸。

（父白）哦，乖喇，乖喇。

（子白）爸爸，今晚同我地去睇戲喇，

（父白）你地想去睇戲，哈哈。

（父唱三脚櫈）今晚有古仔聽，唔好去睇戲，家姊佢講故事，包你笑微微。

（仙唱流水南音）有個跛脚佬，行路如飛，佢由香港，行去印尼，遇着幾隻水牛，爬上樹尾，原來佢等住，搭飛機。（小停）

（子白）丫，亞家姊車大砲呀，水牛唔會爬上樹，

（女白）响樹上都搭唔倒飛機架嗎，呃我地嘅。

（父白）世界維新喇嗎，就嚟樹頂都設晒飛機站嘅喇。咪嘈，講埋先。

（仙續唱）個的老鼠搭棚，做大戲，捉住隻貓公，剝左的皮，驚動的魚蝦，同佢講道理，要去找尋皇帝，分斷是非。（小停）

（子白）又係假嘅，老鼠點會做戲嘅呢。

（父白）我地厨房時時都老鼠做戲。

（女白） 只有貓捉老鼠嘅啫，唔會老鼠捉貓嘅。

（父白）車，或者個隻老鼠招幾重，個隻貓就三四斤，隻貓就唔夠隻老鼠打嘅喇。

（仙續唱）誰知個皇帝，佢話好少理，實行辭職，去做乞兒。