「中秋月」普照人間

八月十五又試嚟到，月餅巳經上市，呢陣時，細佬哥都識唱兩句話：「八月十五是中秋，有人快活有人愁！」

咪當呢句說話係隨口唱出，其實裡便有一売眼淚。呢套畫戲「中秋月」，就係話一個小職員就爲呢個「中秋節」，張羅送禮，搞到焦頭爛額嘅經過。有人話：「人生幾見月當頭」，中秋節大節流流，家家戶戶，都應該髙高興興，家爺仔乸團聚埋嚟賞吓月光，食吓月餅。但係，今時今世，好多人話兩餐都唔掂，就算個月光圓到極，又有乜心情嚟賞？

有人話睇完「中秋月」，起先個心好翳，因爲呢個小職員嘅際遇，事實上同自己嘅際遇差唔多，想到中秋又到，呢個關都晤知點樣過：但係想到後尾，呢個小職員兩公婆對住月光越想越嬲，佢話呢種咁嘅光景，幾時得完？長此以往，點搞得掂？於是佢哋又話，終有一日，光明普照，個陣歡聲遍世界，家家團圓渡中秋。我哋睇戲嘅就人人想到：眞有個日，「有人快活冇人愁」就好，旣然人人有咁嘅希望，佢話呢種日子終須有日嚟到。

所以話：睇完「中秋月」，雖然中秋節難過，惟是唔駛傷心，晤駛翳肺，做人應該睇得遠的，世界終須會好，個陣烏雲掃盡，月光就會普照人間。　（黃喜）