「暴雨梨花」戲中戲

冷暖洞房春

景：新房

時：夜

人：薛丁山：任劍輝飾

　　樊梨花：羅艷卿飾

侍女

（場上佈置：案上龍鳳燭，窗外明月）

（樊梨花作新娘打扮，在新房內等候着新郎正在顧影自憐）

（銀台上一句起幕）

樊梨花唱：「小曲走馬」

寳珠翡翠伴雲髻　人更美麗　宵宵愛月照窗西，

今宵怕月暗相窺，皆因今晚同郞入繡幃。

丁山食住合字轉二簧板面，由侍女掌燈籠引住上唱：

正話堂前醉酒半沉迷。

憶起以往嘅事我都唔願製，的噉嘅刁妻，點可以白髮齊。

愛唔嚟，我恨無良計嚟抵抗雌威，唉！難減我心中翳。

「轉唱小紅燈曲」實在翳到唔翳嘅叻，時常都望圍。

今好嬌妻，當下人亂咁駛，隨便咁嚟發郎禮，「轉唱二簧上句」噉至覺得心頭，快慰。（拉腔）

（入房與梨花關目，作怒容相同之狀）

（梨花關目另場介禿頭唱木蘭從軍小曲——

你話佢享處嬲乜鬼呢？……………

雙眼將人厲，個樣確係惡睇，唔通醉左至入嚟。

「轉二簧下句」都要殷懃侍奉，可表婦道，無虧，「序」鬼叫你做人妻咩？「曲」含笑上前，先行個夫妻，之禮，（行禮介）

丁山接唱：「二簧序」蝦！乜你近來咁好禮呀喂？

（順三才怒介）

（的的撐梨花忍住怒氣介，禿頭唱起賣報歌）

喂喂喂？（作弄口舐面狀態）喂喂喂？

梨花：「接唱賣報歌」

問你癲嘅還是廢？正話見面就發郞禮，哎吔嬲乜唧？前世鬼！我地斬眼就一世叻，往事無謂計，共你亦無謂，爭亦無謂算我認錯啦好夫婿。

丁山：（冷笑介）「短序爽南音」吓吓，係奇怪事叻，乜你肯認句低威？我係你陣前嘅敗將，重衰過地底泥，今日你奉旨嫁老公何等架勢，總係昂藏七尺，未必肯把頭低，欲想冰釋前嫌，除非你下跪。噉就無所謂，若果净係口頭認錯，我就勢不入羅幃。（的的撑，梨花翳極介）

梨花：「長句花下句」我嘅心已灰，情未廢，怕見獨影搖紅花並蒂，照人歡笑照我悲啼，講乜嫁夫憑夫貴，我反遭人奚落，嘆句命運不齊，我怨夫郞，（一才）我又愛夫郞。（一才）一跪表痴心，望你恕饒一切。

丁山：「花下句」我問心難過，忍將妻你難爲，用手相扶（扶起梨花介）妻呀！今後永遠做對多情伉儷。